Aqordada Memlekettik keńesshi Erlan Qarınniń tóraǵalyǵymen bıylǵy Joldaýdyń qorytyndysyna arnalǵan dástúrli keńes ótti. Oǵan Úkimet músheleri, Prezıdent Ákimshiligi qurylymdyq bólimsheleriniń jetekshileri, oblystar men respýblıkalyq mańyzy bar qalalar ákimderiniń orynbasarlary, óńirlik basqarmalardyń basshylary qatysty.
Jıynda Memleket basshysynyń bastamalaryn iske asyrý, etnosaralyq, konfessııaaralyq kelisimdi nyǵaıtý, qoǵamdyq birlestiktermen, sarapshylarmen ózara is-qımyl, aqparat, otbasy jáne jastar saıasaty máseleleri qaraldy.
«Prezıdent jańa ulttyq strategııany usyndy. Ol – aýqymdy sıfrlyq transformasııa jáne jasandy ıntellektini engizý. Osy arqyly Qazaqstan bolashaqta tehnologııalyq turǵyda damyǵan el retinde tanylýdy kózdep otyr», dep Memlekettik keńesshi bıylǵy Joldaýdyń negizgi ıdeıasyn aıqyndap kórsetti.
Sondaı-aq Erlan Qarın ishki saıası jumystyń negizgi basymdyqtaryna toqtaldy.
«Jańa sapaly ultty damytýdyń mańyzdy shartynyń biri – jańa qoǵamdyq etıkany qalyptastyrý. Oǵan jaýapkershilik mádenıetin ilgeriletý, jasampazdyqqa negizdelgen qundylyqtardy ornyqtyrý, «Zań jáne tártip» qaǵıdatyn bekitý jatady», dedi E.Qarın.
Budan bólek, Memlekettik keńesshi: «Túrli áleýmettik saýalnamalar qoǵamnyń prezıdenttik reformalardy joǵary deńgeıde qoldaıtynyn turaqty túrde kórsetip keledi. Alaıda salalyq memlekettik organdar árdaıym aqparattyq alańǵa monıtorıng jasap, azamattardyń ózekti suranymdaryna taldaý júrgizip otyrýǵa tıis. Bul rette obektıvti suranymdardy túrli alypqashpa áńgimeler men manıpýlıasııalardan ajyrata bilý mańyzdy. Birinshi jaǵdaıda dıalog arqyly birlesken tıimdi sheshimderdi izdestirý kerek, al ekinshi jaǵdaıda zań aıasynda feıkter men jalǵan aqparattyń jolyn kesý mańyzdy», dedi.
Keńes qorytyndysy boıynsha jaýapty memlekettik organdarǵa naqty tapsyrmalar berilip, ishki saıasat salasynda jańa tásilderdi jedel engizýdiń mańyzdylyǵy atap ótildi.