Túrkistan oblysy, Shardara aýdany, О́teǵul eldi mekeninde ornalasqan №3 jalpy bilim beretin Keleshek mektebinde ata-analar úshin ashyq esik kúni ótti. Bir aýysymda 300 oqýshyǵa arnalǵan jańa bilim ordasy zamanaýı talaptarǵa saı salynǵan, dep jazady Egemen.kz.
Mektepte pán kabınetteri tolyq jabdyqtalyp, STEM-zerthanalar, bıologııa, hımııa, fızıka synyptary tájirıbelik sabaqtarǵa arnalǵan quraldarmen qamtamasyz etilgen. Sondaı-aq oqýshylardyń shyǵarmashylyq jáne sporttyq áleýetin damytý úshin horeografııa zaly, zamanaýı sport zaly men alańy, mýzyka jáne beıneleý óneri kabınetteri, eńbekke baýlý sheberhanalary qarastyrylǵan. Kitaphana, ashana, AKT zaly, kovorkıng pen demalys aımaqtary da bar.
Ashyq esik kúni barysynda ata-analar mekteptiń ishki tártibimen, oqý kabınetterimen, qosymsha úıirmelermen jáne zamanaýı jabdyqtalǵan synyptarmen tanysty. Mektep dırektory Erkináli Aqberdıev bul is-sharanyń ata-analar men mektep arasyndaǵy senimdi nyǵaıtýǵa baǵyttalǵanyn atap ótti. Onyń aıtýynsha, «Keleshek mektepteri» ulttyq jobasynyń ıgiligin О́teǵul aýylynyń turǵyndary da kórip otyr. Buǵan deıin eldi mekendegi jalǵyz bilim uıasy úsh aýysymdy mektep qataryna enýge shaq qalǵan edi.
«Bizdiń maqsatymyz – oqýshylarǵa sapaly bilim berýmen qatar olardyń jan-jaqty damýyna jaǵdaı jasaý. Memleket basshysy Qasym-Jomart Toqaevtyń bastamasymen júzege asyp jatqan «Keleshek mektepteri» ulttyq jobasy aýyl balasyna úlken múmkindik berip otyr», dedi mektep dırektory.
Ata-analar jańa mekteptiń oqý-tárbıe úderisin tıimdi uıymdastyrýǵa qolaıly ekenin, kabınetterdiń keń ári qaýipsiz ekenin jáne balalardyń bos ýaqytyn tıimdi ótkizýge jaǵdaı jasalǵanyn joǵary baǵalady.
Mundaı kezdesýler aldaǵy ýaqytta dástúrli túrde ótip, mektep pen ata-analar arasyndaǵy yntymaqtastyqty nyǵaıtýǵa yqpal etpek.
Aıta keteıik, «Keleshek mektepteri» baǵdarlamasy aıasynda eń kóp mektep Túrkistan oblysynda salynýda. Búgingi tańda óńirde 29 mekteptiń 21-i qoldanysqa berildi. Aldaǵy toqsanda taǵy segiz jańa mektep oqýshylarǵa esigin ashady.