Pavlodar oblysynda júk kóligimen soqtyǵysqan jol apatynan bes adam kóz jumdy, dep habarlaıdy oblystyq polısııa departamenti.
Aldyn ala málimetke sáıkes, qaıǵyly oqıǵa 23 qyrkúıek kúni «Pavlodar – Qyzylorda» avtojolynda (Pavlodar – Astana avtobany), Baıet aýylynan bes shaqyrym jerde bolǵan.
Toyota Lucida avtokóliginiń júrgizýshisi jolda qaýipsizdikti qamtamasyz etpeı, qashyqtyqty saqtamaǵan. Sonyń saldarynan kólik Sitrak júk kóligimen soqtyǵysyp, jeńil avtokólik órtenip ketken.
Apat saldarynan Toyota-nyń júrgizýshisi men tórt jolaýshysy oqıǵa ornynda qaza tapty.
Atalǵan fakti boıynsha qylmystyq is qozǵaldy.
Polısııa departamenti mundaı qaıǵyly jaǵdaılardyń aldyn alý úshin júrgizýshilerge jolda jyldamdyq rejımin qatań saqtaýdy, ásirese kólik qozǵalysy qarqyndy ýchaskelerde erekshe muqııat bolýdy jáne avtokóliktiń tehnıkalyq jaǵdaıyn únemi qadaǵalaýdy eskertedi.