Oral qalasynda batysqazaqstandyq isker áıelder qaýymdastyǵynyń qoldaýymen «Anaǵa taǵzym» atty eńseli eskertkish ashyldy.
Sábıin aıalaı kótergen ananyń sáýletti beınesi Oral qalasyndaǵy jas jubaılardyń nekesin qııatyn Saltanat saraıy aldyna ornatyldy. Eskertkishtiń avtory – astanalyq músinshi Bolatbek Salaev bolsa, qarjylaı qoldaǵan – Oral qalalyq máslıhatynyń depýtaty, kásipker, «Prıorıtet» kompanııasynyń basshysy Janna Kenjına.
– Bul eskertkish jobasy oblystyq isker áıelder qaýymdastyǵynyń 30 jyldyǵyna oraı júzege asty. Eki jyl buryn ótken forýmda óńirge belgili ustaz Shalqyma Haırollaqyzy, aqyn Aqushtap Baqtygereıqyzy «bizdiń qalaǵa ana obrazyn ashatyn, kúlli qazaq Anasyna taǵzym etetin bir eńseli eskertkish kerek-aq» degen ıdeıa kótergen bolatyn. Árıne, bul usynysty biz, isker áıelder qaýymdastyǵy birden qoldadyq. Mine, eki jyl boıy josparlap, búgin júzege asyryp otyrmyz, – deıdi qaýymdastyq jetekshisi Jansulý Meńeshqyzy.
– Búgin barshamyz úshin júrekke jaqyn, erekshe sát boldy! Eskertkishtiń dál osy jerde turýyna qoldaý bildirgen oblys pen qala ákimdigine, isker áıelder qaýymdastyǵynyń basshysy Jansulý Meńeshqyzyna alǵys bildiremiz. Perzent úshin Anadan aıaýly jan joq. Bizge ǵalamnyń jaryǵyn syılaǵan aıaýly jandarǵa shynaıy qurmetimizdi sózben emes, ispen bildirgendi jón kórdik. Osy is arqyly urpaqqa úlgi bolǵymyz keldi, – deıdi kásipker Janna Tájiǵulqyzy.
Oraldaǵy qala kúni merekesi aıasynda ashylǵan eskertkish saltanaty «Eńbegi janǵan arýlar» atty isker áıelder forýmyna jalǵasty. Jıynda sóz alǵan pedagogıka ǵalymdarynyń doktory, professor Shalqyma Qurmanalına: «Bul jáı eskertkish emes, bul Domalaq anadan bastap, barlyq analarǵa arnalǵan qurmet, taǵzym» dep baǵalady. Maǵynaly músinniń neke saraıy aldynda turýy áıel, ana beınesin, otbasy qundylyǵyn arttyra túsedi.
Batys Qazaqstan oblysy