Japonııa astanasy Tokıoda jeńil atletıkadan álem chempıonaty aıaqtaldy. Osydan alty jyl buryn HHHII jazǵy Olımpııa oıyndary qarsańynda boı kótergen, 68 000 kórermenge eseptelgen Ulttyq stadıonda uıymdastyrylǵan dúbirli dodada 198 memlekettiń myqtylary óner kórsetti.
49 júlde jıyntyǵy sarapqa salyndy. О́kinishke qaraı, sol medaldiń birde-bireýi elimizdiń jeńil atletterine buıyrmady. Eń úzdik kórsetkishke Nora Djerýto qol jetkizdi. Kenııalyq legıonerdiń álem chempıony degen ataǵy baryn jankúıerler jaqsy biledi. Biraq bul joly 3 000 metrge kedergiler arqyly júgirgen Djerýto altynshy orynnan asa almady. Dál sol qashyqtyqta Deızı Djepkemeı 7-satyǵa taban tirese, 10 000 metrlik saıysta 16-orynǵa turaqtady. 20 shaqyrymdyq sporttyq júriste Iаsmına Toqsanbaeva 23-orynda qalyp qoıdy. Osy sport túriniń 35 shaqyrymynda Polına Repına 35-satyǵa jaıǵassa, Galına Iаkýsheva márege jete almady. Sóıtip, jyldyń basty básekesinde legıonerlerden de, ózimizdiń tól sportshylarymyzdan da qaıyr bolmady.
Álem chempıonatynyń eń bir qyzyqty tustaryna toqtalar bolsaq, erler arasynda Arman Dıýplantıs asqan sheberligimen taǵy da tánti etti. Keıingi jyldary aldyna jan salmaı júrgen 25 jastaǵy Shvesııanyń syryqpen sekirýshisi bul joly 6 metr 30 satımetrlik mejeni baǵyndyrdy. Bul – ǵajaıyp kórsetkish! Jalpy, Arman 2020 jyldan beri ár jarys saıyn nátıjesin 1 santımetrge jaqsartyp keledi. Barlyǵy 14 ret álemdik rekordty jańartty. Ár rekordyna sportshy Halyqaralyq jeńil atletıka federasııasynan (IAAF) 100 000 AQSh dollary kóleminde syıaqy alady. Sol sebepti de tórtkúl dúnıeniń teńdessizi, aryndy Arman birden birneshe santımetr qospaı, «aqyryn júrip, anyq basýdy» qup kóredi.
100 metrge júgirýshiler saıysynda Iаmaıkanyń qos sprınteri – Oblıs Sevıll men Kısheın Tompson bas júldeni ózara sarapqa saldy. Alǵashqysy – altyn, ekinshisi – kúmis aldy. Odan eki ese uzaq qashyqtyqta AQSh-tyń arlandary – Noa Laıls pen Kennı Bednarektiń baǵy jandy. 4h100 metrlik estafetada amerıkalyqtar aldaryna jan salmasa, 4h400 saıysy oıda-joqta Botsvana quramasynyń jeńisimen aıaqtaldy. Afrıkalyqtardan dál osyndaı nátıjeni eshkim kútpegen edi. Marafonshylar jarysynda tanzanııalyq Alfons Sımbýdyń mereıi ústem boldy.
Áıelder arasynda AQSh-tyń jelaıaǵy Melıssa Djefersson 100, 200 metrlik saıystarda shashasyna shań juqtyrmady. Orta qashyqtyq pen marafonda Kenııanyń «qara marjandary» qarsylas shydatpady. Bul básekelerde Lılıan Odıra (800 metr), Feıt Kıpegon (1 500 metr), Beatrıs Chebet (5 000, 10 000 metr), Peres Djepchırchır (marafon) jeńimpaz atandy. Ispanııanyń sportshysy Marııa Peres 20, 35 shaqyrymdyq sporttyq júriste top jardy.
Tokıodaǵy jarystyń júlde qory 8 498 000 dollardy qurady. Chempıondar 70 000-dy oljalasa, kúmispen kúptelgender 35 000-dy ıelendi. Qolaǵa qol sozǵandar 20 000-dy enshiledi. Syıaqy 4-8 oryndy enshilegen jeńil atletterge de buıyrdy.