Taraz qalasynda aýyl sharýashylyǵy taýarlarynyń jármeńkesi jıi uıymdastyrylady. Shaharlyqtar kúndelikti tutynatyn taýarlar naryqtaǵy saýdadan 15-20% tómen baǵamen usynylatyn jármeńkege japa-tarmaǵaı aǵylady.
Bul joly tarazdyq kásipkerler 18 tonnadan astam aýyl sharýashylyǵy taýarlaryn arzandatylǵan baǵamen usyndy. Jergilikti atqarýshy bılik ókilderiniń aıtýynsha, kóńilge qonymdy baǵamen ótkerilgen azyq-túlik ónimderiniń jalpy quny 11,8 mln teńgeni quraıdy.
Tarazdyqtar keltirgen derekke júginsek, olar kartoptyń kılosyn 280, sábizdi 110 teńgeden satyp alǵan. Sondaı-aq ózge de taýarlar naryqtaǵy qunynan arzan baǵamen ótkerilgen. Shahar turǵyndarynyń aıtýynsha, barlyq ónim qoljetimdi ári sapaly bolǵandyqtan olar jármeńke uıymdastyrylatyn kúni áleýmettik bazarǵa asyǵatyn kórinedi.
Ilgeride jármeńkege tarazdyq aýyl sharýashylyǵy taýar óndirýshileri ǵana qatyssa, bul joly Jambyl jáne Baızaq aýdandarynan qala quramyna ótken birneshe eldi mekenniń sharýalary da jyly-jumsaqtaryn ala kelipti. Olar aldaǵy ýaqytta da jármeńkege udaıy qatysýǵa nıet bildirip otyr. Jergilikti atqarýshy bılik ókilderiniń sózinshe, jyl saıyn turaqty túrde uıymdastyrylatyn aýyl sharýashylyǵy ónimderiniń jármeńkesi aldaǵy ýaqytta da toqtamaq emes. Bıyldyqqa osymen segizinshi márte ótkizilipti.
«Jospar boıynsha 20 jármeńke ótkizýimiz kerek. Sondyqtan bul jumys ilki sátke de toqtamaq emes. Aýdandardyń qatysýymen de aýyl sharýashylyǵy ónimderi jármeńkesin ótkizýge qulshynyp otyrmyz. Naqtyraq aıtsam, 4 qazan kúni qala kúni merekesi aıasynda úlken jármeńke ótkizemiz. Oǵan qaladaǵy sharýalarmen birge óńirdegi 10 aýdannyń kásipkerleri de qatysady», deıdi Taraz qalalyq aýyl sharýashylyǵy bóliminiń basshysy Janbolat Tańatarov.
Oblys ortalyǵynda turaqty uıymdastyrylatyn jármeńke kópshilik úshin tıimdi ekeni anyq. Shahar turǵyndarynyń sózine sensek, aýyl sharýashylyǵy taýar óndirýshileriniń qatysýymen ótetin jármeńkege olar únemi kelip turady. О́ıtkeni mundaǵy baǵa qaltaǵa artyq salmaq salmaıdy. Eń bastysy, qalaǵan azyq-túligińdi molynan satyp alýǵa múmkindigiń bar.
«Oblys ortalyǵynda uıymdastyrylatyn aýyl sharýashylyǵy jármeńkesi kóńilimizge qonady. Munda kúndelikti ómirge qajet azyq-túliktiń barlyǵy derlik bar. Eń bastysy, árbir otbasyna qajet taýarlar naryqtaǵy qunynan áldeqaıda tómen baǵamen satylyp jatyr. Sondyqtan jármeńke ótetin kúni osynda asyǵamyz. Munda kelip ózimizge qajet ónimderdi turaqty túrde alyp turamyz. Jármeńkeni júıeli túrde uıymdastyryp júrgen azamattarǵa aıtar alǵysymyz sheksiz», deıdi qala turǵyny Kúláıhan Maratqyzy.
Taraz