Eńbek ınspektorlarynyń málimetinshe, qaıǵyly jaǵdaı boıynsha tekseris bastalyp ketti, dep habarlaıdy Egemen.kz.
Pavlodar oblysy jedel medısınalyq járdem stansasynyń habarlaýynsha, 23 qyrkúıek kúni saǵat 15:00 shamasynda JEO-2-ge shaqyrtý túsken. Brıgada 9 mınýt ishinde oqıǵa ornyna jetkenimen, zardap shekken adam dárigerler kelgenge deıin qaıtys bolǵan.
Jumysshynyń qaza tapqanyn eńbek ınspektorlary da rastady. Olar jaǵdaıdyń mán-jaıy tekseris barysynda anyqtalatynyn atap ótti.
«Pavlodarenergo» AQ-nyń JEO-2 stansııasynda jumys barysynda qaıǵyly oqıǵa oryn aldy. Nátıjesinde 1992 jyly týǵan 4-razrıadty dánekerleýshi alǵan jaraqattarynyń saldarynan oqıǵa ornynda kóz jumdy», dep habarlady Pavlodar oblysy boıynsha memlekettik eńbek ınspeksııasy komıtetiniń departamenti.