О́zbekstanda úılený toılary, as berý rásimderi jáne basqa da otbasylyq sharalarǵa 200-den artyq qonaq shaqyrýǵa tyıym salyndy. Bul talap 2025 jylǵy 16 qyrkúıekte mınıstrler kabıneti bekitken «Rasıonaldy tutyný» baǵdarlamasynda kórsetilgen, dep jazady Egemen.kz.
Baǵdarlamanyń maqsaty – azyq-túlik qaýipsizdigin qamtamasyz etý, orynsyz shyǵyndardy qysqartý, únem mádenıetin qalyptastyrý.
Buǵan deıin de 2019 jyly qabyldanǵan qujatta toıǵa 200 adamnan artyq shaqyrýǵa bolmaıtyny, palaý taratý 250-300 adamǵa deıin ruqsat etiletini jazylǵan edi.
Jańa tártipke sáıkes, saltanat kezinde artyq shoý-baǵdarlamalar ótkizýge, qosymsha toı-tomalaq uıymdastyrýǵa bolmaıdy. Sondaı-aq jerleý jáne as berý rásimderinde de shyǵyndardy qysqartý qarastyrylǵan.