Sınoptıkterdiń habarlaýynsha, elimizde qyrkúıek aıynyń 25, 26 jáne 27-i kúnderi atmosferalyq frontaldi bólimderdiń ótýine baılanysty turaqsyz aýa raıy saqtalady. Respýblıkanyń basym bóliginde jańbyr jaýyp, naızaǵaı oınaıdy, dep habarlaıdy Egemen.kz.
26 qyrkúıekte Batys pen Soltústik-batysta, al 27 qyrkúıekte Soltústik pen Soltústik-batys óńirlerde nóserli jaýyn-shashyn kútilip, keı jerlerde burshaq aralas jaýyn men qatty jel soǵady. Sondaı-aq, respýblıkanyń shyǵysy men ońtústik-shyǵysynda túngi jáne tańǵy ýaqytta tuman túsýi yqtımal.
Batys óńirinde túngi kórsetkishter 12–17 gradýstan 2–7 jylylyqqa deıin tómendep, keı jerlerde 2°S-qa deıin úsik júredi. Kúndizgi temperatýra 20–28 gradýstan 10–23°S aralyǵyna deıin tómendeıdi.
Soltústik-batysta túnde 7–15 gradýstan 3–11 jylylyq kútiledi. Kúndizgi temperatýra 23–29-dan 10–18°S-qa deıin ózgeredi.
Soltústik óńirde túnde 10–16 jáne 5–13 °S shamasynda jyly bolsa, kúndiz 20–28-den 12–25 °S aralyǵynda saqtalady.
Ortalyqta túngi temperatýra 5–13 °S, kúndiz 20–25 °S jyly bolady. Al shyǵysta túnde 0–8-den 7–15 °S-qa deıin jylylyq kútiledi, keıbir aımaqtarda 2°S-qa deıin úsik bolýy yqtımal. Kúndizgi kórsetkishter 15–25-ten 20–28 °S-qa deıin kóteriledi.
Ońtústikte túnde 5–15 °S jyly, kúndiz 25–30 °S ystyq kútiledi. Ońtústik-shyǵysta túngi temperatýra 5–13-ten 7–15 °S aralyǵynda bolsa, kúndiz 15–27-den 22–30 °S-qa deıin kóteriledi.