Elordada 2026 jyldan bastap kúshine enetin jańa Salyq kodeksine arnalǵan respýblıkalyq semınarlardyń qorytyndy kezdesýi ótti. Is-sharaǵa Úkimet músheleri, onyń ishinde Premer-mınıstrdiń orynbasary – Ulttyq ekonomıka mınıstri Serik Jumanǵarın, Qarjy mınıstri Mádı Takıev, Memlekettik kirister komıteti men «Atameken» ulttyq kásipkerler palatasynyń ókilderi qatysty, dep habarlaıdy Egemen.kz.
Semınar barysynda vıse-premer kásipkerlikke tikeleı qatysty ózekti taqyryptardyń biri – arnaıy salyq rejımderi jóninde túsinikteme berdi.
«Basty qaǵıda: buǵan deıin kim ońaılatylǵan salyq rejıminde jumys istep kelgen bolsa, sol rejımde qalady», dedi Serik Jumanǵarın.
Sonymen qatar ol óńdeý ónerkásibi salasyna engiziletin jańa erejelerge toqtaldy. Mınıstrdiń aıtýynsha, túpki tutynýshyǵa baǵyttalǵan kásiporyndarǵa jeńildetilgen salyq rejımin qoldanýǵa múmkindik beriledi.
«О́ńdeý ónerkásibiniń bir bóligine ruqsat beremiz. Eń aldymen, ol kásiporyn ofsette nemese iri kásiporyndar úshin jetkizýshi bolyp sanalmaıtyn B2C sektoryna baǵyttalǵan bolýy tıis», dep naqtylady ol.
Al salanyń qalǵan bóligi jalpyǵa ortaq salyq salý tártibine kóshedi. Bul sheshim óńdeý kásiporyndary úshin qoldanystaǵy salyqtyq yntalandyrý sharalarynyń bar bolýymen baılanysty. Máselen, óndiristik maqsattaǵy ımportqa QQS esepteledi, sondaı-aq jańǵyrtý jumystary kezinde de salyq alynbaıdy.
Vıse-premer memleket tarapynan kórsetilip jatqan qoldaýlardy da erekshe atap ótti. Onyń sózinshe, qazir damý ınstıtýttary arqyly aýqymdy baǵdarlamalar júzege asyrylyp otyr.
«Biz damý ınstıtýttary boıynsha aýqymdy baǵdarlamany bastadyq. «Báıterekti» kapıtaldandyrý bıyl 1 trln teńgege jýyqtady, al úsh jyldyq bıýdjetke jyl saıyn 1 trln teńgeden salyp otyrmyz. Bizdiń bızneske, sonyń ishinde negizinen óńdeý ónerkásibine jasap otyrǵan qoldaý sharalarymyz qomaqty qarjyny talap etedi. Sol sebepti jalpy alǵanda óńdeý salasy qoldaýdan shet qalmaıdy deýge bolady», dedi Jumanǵarın.