Qarjy mınıstri Mádı Takıevtiń aıtýynsha, jańa Salyq kodeksinde azamattar men bıznes úshin birqatar mańyzdy ózgerister qarastyrylǵan. Solardyń ishinde kólik ıelerine paıdalaný merzimi 10 jyldan asqan avtokólikterge salynatyn salyq mólsheri tómendetiledi, dep habarlaıdy Egemen.kz.
Mınıstrdiń sózinshe, reformanyń taǵy bir basty qadamy – banktik shottardy avtomatty túrde buǵattaýdan bas tartý. Onyń ornyna kásipkerlerge óz qyzmetin toqtatpaı-aq qatelikterin túzetýge múmkindik beretin aldyn ala kameraldyq tekserý engiziledi. Sondaı-aq salyqtyq ákimshilendirýdi sıfrlandyrý men servıstik modelge kóshý kózdelip otyr. Mundaǵy maqsat – baqylaýdan góri bızneske keńes berip, qoldaý kórsetý.
«Qarastyrylǵan ózgerister kásipkerlerdiń jumysyn edáýir jeńildetedi. Salyq eseptiligin azaıtý jáne salyqty azaıtý bızneske qaǵazbastylyqqa emes, damýǵa nazar aýdarýǵa múmkindik beredi. Shottardy avtomatty túrde buǵattaýdan bas tartý – bul ádil jáne ashyq qarym-qatynasqa qaraı jasalǵan mańyzdy qadam. Onda memleket kompanııalardyń jumysyn toqtatýdyń ornyna máseleni sheshýge kómektesedi. Mundaı sharalar memleket pen kásipker arasyndaǵy dıalogty nyǵaıtyp, qolaıly ınvestısııalyq ahýal týǵyzady», dedi Mádı Takıev.
Jańa kodekste saralanǵan salyq stavkalary, progressıvti jeke tabys salyǵy jáne sán-saltanat salyǵy engizilmek. Zeınetaqy tólemderi JTS-ten bosatylady, múgedektigi bar adamdarǵa qosymsha salyqtyq shegerimder beriledi, áleýmettik mańyzdy medısınalyq qyzmetter QQS jeńildikterimen qamtylady.
Bıznes úshin arnaıy salyq rejımderi ońtaılandyrylyp, endi tek úsh túri qalady: ózin-ózi jumyspen qamtyǵandar úshin, jeńildetilgen deklarasııamen jumys isteıtin shaǵyn bıznes úshin jáne fermerler úshin. Sonymen qatar QQS boıynsha mindetti tirkeý shegi 70 mln teńgeden 40 mln teńgege deıin tómendetilip, salyq tóleýshilerdiń sheńberi keńeıtiledi.
«Atameken» UKP tóraǵasy Raıymbek Batalov ta bıznes pen memleket arasyndaǵy syndarly dıalogtyń mańyzdylyǵyn atap ótip, qajet bolǵan jaǵdaıda Salyq kodeksine jedel túzetýler engizýge daıyn ekenderin jetkizdi.
«Biz kásipkerlermen jáne ýákiletti organdarmen pikir almasamyz. Máseleniń bir bóligi ishki normatıvtik qujatpen retteledi. Eger tájirıbe Salyq kodeksindegi keıbir tarmaqtyń esepke alynbaǵanyn jáne onyń bızneske teris áser etetinin kórsetse, onda UKP Qarjy jáne Ulttyq ekonomıka mınıstrlikterimen birge NQA-ǵa qajetti túzetýlerdi jedel engize alady», dedi ol.