Shymkent qalasyna jumys sapary aıasynda QR Premer-mınıstriniń orynbasary Ermek Kósherbaev qaladaǵy birqatar áleýmettik mekemeniń qyzmetimen tanysty, dep habarlaıdy Egemen.kz.
Atap aıtqanda, ol 240 orynǵa eseptelgen №2 arnaýly áleýmettik qyzmet kórsetý ortalyǵyn aralady. Munda 18 jastan asqan psıhonevrologııalyq syrqaty bar azamattarǵa stasıonarlyq qyzmet kórsetiledi. Búginde ǵımaratqa kúrdeli jóndeý júrgizýge jáne ınjenerlik jelilerdi jańartýǵa qajettilik týyndap otyr. Bul másele tıisti memlekettik organdar men sarapshylardyń qatysýymen jumys tártibinde qaralady.
Sonymen qatar Belsendi uzaq ómir súrý ortalyǵyna erekshe nazar aýdaryldy. Atalǵan ortalyq aǵa býyn ókilderi arasynda úlken suranysqa ıe. Munda zeınetkerlerge medısınalyq jáne psıhologııalyq keńester, sporttyq jáne shyǵarmashylyq úıirmeler, kompıýterlik saýattylyq pen shet tilderin úıretý sııaqty keń aýqymdy qyzmetter kórsetiledi. Búginde ortalyqtyń múmkindikterin 130-ǵa jýyq adam paıdalanyp júr.
Sapar barysynda Ermek Kósherbaev zeınetkerlermen tildesip, olardyń oı-pikirlerin tyńdady. Shymkent qalasynyń turǵyny Aınagúl Myrzaeva ortalyqqa kelgennen keıingi óz áserimen bólisti.
«Buryn kóp ýaqytty úıde jalǵyz ótkizetinmin. Munda jańa dostar taptym, túrli qyzyqty istermen aınalysamyn. Kóńil-kúıim kóterilip, ómirge degen qulshynysym qaıta oraldy. Biz bıleımiz, áńgimelesemiz, munda densaýlyǵymyzǵa da muqııat qaraıdy», — dedi ol.
Sol kúni ortalyqta áýen oınap, zeınetkerler vals bılep, jastyq jiger men ómirge degen qulshynys adamnyń jasymen ólshenbeıtinin kórsetti.
«Qart adamdardyń densaýlyǵyn saqtaý ǵana emes, olardy qoǵamnyń belsendi múshesi retinde sezinýine jaǵdaı jasaý asa mańyzdy. Shymkentte biz medısınalyq qyzmet, mádenı damý jáne jyly qarym-qatynas ortasyn úılestirgen úlgini kórip otyrmyz. Mundaı ortalyqtar – aǵa býyn úshin naǵyz tirek. Elimizdiń ár óńirinde osyndaı mekemeler ashylyp, birde-bir qarııa qamqorlyqsyz qalmaýy úshin jumys isteımiz», — dep atap ótti Ermek Kósherbaev.
Búginde Shymkent qalasynda 99 myńnan astam zeınetker turady. Olardyń ishinde 1 482 tyl ardageri men Uly Otan soǵysynyń 1 ardageri bar. Olarǵa qamqorlyq kórsetý – tek qoǵamnyń ǵana emes, memlekettiń de basty mindeti. Úkimet mundaı ortalyqtardyń damýyn júıeli túrde qoldap keledi. Sebebi olar aǵa býyn ókilderine qurmet pen senimdilik sezimin berip, laıyqty ómir súrýine múmkindik jasaıdy.