Ál-Farabı atyndaǵy Qazaq ulttyq ýnıversıtetinde «Matematıka, mehanıka jáne aqparattyq tehnologııalar» atty H halyqaralyq ǵylymı konferensııa óz jumysyn bastady, dep jazady Egemen.kz.
Aýqymdy ǵylymı shara Ǵylym jáne joǵary bilim mınıstrliginiń qoldaýymen uıymdastyrylýda.
Konferensııaǵa Qazaqstan, AQSh, Ulybrıtanııa, Japonııa, Italııa, Reseı, Portýgalııa, Pákistan, Ázerbaıjan, Lıtva, Grýzııa jáne basqa da elderdiń kórnekti ǵalymdary men sarapshylary qatysyp jatyr.
Alqaly jıyndy QazUÝ-dyń Basqarma tóraǵasy-rektor Janseıit Túımebaev quttyqtaý sózben ashyp, sıfrlyq tehnologııanyń mańyzyna toqtaldy.
«Sıfrlyq tehnologııalardyń damýy – jańa múmkindikter men syn-qaterler kezeńi. El Prezıdenti Qasym-Jomart Toqaev Joldaýynda jasandy ıntellekti basym baǵyt retinde atap ótti. Búginde bul – tek zertteý nysany ǵana emes, sonymen qatar ınjenerlik jáne óndiristik mindetterdi sheshýdiń qýatty quraly. Ýnıversıtetimiz osy baǵytta belsendi ǵylymı jobalar júrgizip, jas ǵalymdar men stýdentterdi ınnovasııalyq qyzmetke keńinen tartýda», – deı kele, rektor ýnıversıtettiń ǵylymı ortalyqtary atqaryp jatqan zertteý jumystarymen tanystyrdy.
Sonymen qatar ashylý saltanatynda QR Ulttyq ınjenerlik akademııasynyń prezıdenti Baqytjan Jumaǵulov, QR UǴA akademıgi Aıdarhan Qaltaev, Reseı ǴA korrespondent-múshesi Sergeı Kabanıhın sóz sóılep, matematıka men mehanıkanyń irgeli máseleleri jaıly pikir bildirdi.
Úsh kúnge sozylatyn halyqaralyq jıyn aıasynda álemdik deńgeıdegi ǵalymdardyń qatysýymen plenarlyq májilister; matematıka, mehanıka, IT salalary boıynsha seksııalyq otyrystar; jas zertteýshiler óz jobalaryn usynatyn stendtik sessııalar; «Ǵylym men ınjenerııadaǵy jasandy ıntellekt: syn-qaterler men múmkindikter» atty dóńgelek ústel jáne ózge de sharalar josparlanǵan.
Konferensııa barysynda Qazaqstan jáne Reseı Ulttyq ǵylym akademııalarynyń akademıkteri, Pıttsbýrg ýnıversıteti, Padýıa ýnıversıteti, London ýnıversıteti (Queen Mary), Nazarbaev Ýnıversıteti jáne ózge de jetekshi ǵylymı ortalyqtar professorlary baıandama jasady. Sondaı-aq úzdik baıandamalar men zertteýler arnaıy syılyqtarmen marapattalmaq.
Basqosýda matematıka men mehanıkanyń irgeli jáne qoldanbaly máseleleri, robototehnıka, aqparattyq tehnologııalar jáne jasandy ıntellekt salasyndaǵy sońǵy jetistikter talqylanady.