Belgili jýrnalıst Ońdasyn Elýbaıdyń «Kózden ketse de...» dep atalatyn kitaby jaryq kórdi. Uzaq jyl «Egemen Qazaqstan» gazetiniń Shyǵys Qazaqstan oblysyndaǵy menshikti tilshisi bolǵan qalamger bul eńbegine zamandastary týraly oı tolǵamdaryn toptastyrǵan.
Kitaptyń birinshi bólimi «Alashtyń abyroıyn asqaqtatqandar» dep atalady. Qazaq balýandary arasynan tuńǵysh Olımpıada chempıony atanǵan dańqty balýan Jaqsylyq Úshkempirovtiń adamı bolmysy, azamattyq kórkem minezi týraly baıandaıdy. Qazaq sportyna ólsheýsiz úles qosqan balýandy jańa qyrynan baıyptaıdy.
2000 jyldary elimizde aýyr atletıka sporty quldyraýǵa ushyrady. Jahandyq dodalarda dittegen nátıjege jete almadyq. Osy tusta, federasııa tizginin Qaırat Turlyhanov ustap, shetelden bilikti bapkerlerdi tartyp, júıeli jumys júrgizdi. Úsh dúrkin Olımpıada chempıony atanǵan túrik aýyr atletteri Naıym Súleımenoǵly men Halıl Mýtlý syndy sańlaqtardy túletken Enver Túrkelerı bapkerdi elge shaqyrdy. Bilgir basshynyń bul baılamy beker bolǵan joq, aýyr atletıkanyń abyroıyn asyrdy. Bizdiń tolaǵaılarymyz da álemniń úzdikteri atanyp, jahan nazaryna ilikti. Qalamger aýyr atletıkany órge súıregen Qaırat Bolatulynyń qaıratkerligin tereńdeı sýretteıdi.
Kitapta erkin kúresten álemdik deńgeıdegi joǵary dárejeli tóreshi, Qazaqstannyń eńbek sińirgen jattyqtyrýshysy Túsiphan Saıhanovtyń salıqaly ǵumyryndaǵy sáýleli sátterin saǵynyshpen baıandaıdy. Sambo kúresinen qazaq jastary arasynda tuńǵysh KSRO sport sheberi Marat Imashev nebári 29 jasynda kóz jumdy. Tarbaǵataı topyraǵynda týǵan tarlannyń otyzǵa jeter-jetpes ǵumyrynda eńsergen asýyn avtor jan-jaqty baıandaıdy.
«Aldyńǵy tolqyn aǵalar» dep atalǵan ekinshi bólimde pýblısıst, baspager Yrym Kenenbaevtyń qazaq baspasózine qosqan jaqsylyǵy týraly aıtady. Bilikti pedagog, KSRO Memlekettik syılyǵynyń laýreaty Qanıpa Bitibaevanyń bolmysy, oqý-aǵartý salasyna qosqan ólsheýsiz úlesine de osy kitapta joǵary baǵa beriledi.
Jazýshy, satırık, kósemsózshi Kópen Ámirbek joǵary oqý ornynda oqyp júrip erkin kúresten sport sheberi ataǵyn alǵanyn kópshilik bile bermeıdi. Avtor kýrstasy Kópenniń qazaq rýhanııatyna sińirgen eńbegin sporttaǵy jetistigimen de qatar órbite sýretteıdi. Sondaı-aq avtor kitabynda qazaq pýblısıstıkasynyń kórnekti ókili, talantty jazýshy Marat Qabanbaevtyń kópshilikke beımálim qyryna, taǵdyr-talaıyna toqtalady. «Kózden ketse de, kóńilde ornyǵyp qalatyn aıaýly azamattardyń aldyndaǵy qurmetim bolsyn degen nıetpen osy kitapty jaryqqa shyǵardym», deıdi O.Elýbaı.