Álemdik tehnologııa alpaýyty Apple jańa smartfon ázirleýde belsendi qadam jasap otyr. Nikkei Asia jarııalaǵan derekterge qaraǵanda, kompanııa Taıvanda synaqtyq óndiris alańyn iske qosyp, búkteletin iPhone modelin jasaýǵa kirisken. Bul kópten beri qaýesetke aınalǵan ónimniń naqty júzege asýyna jaqyndaǵanyn kórsetedi, dep jazady Egemen.kz.
Sarapshylardyń aıtýynsha, synaq kezeńi aıaqtalǵannan keıin jappaı óndiris Úndistanǵa aýystyrylýy múmkin. Bul sheshim Apple-dyń óndiristik tizbegin ártaraptandyrý jáne Qytaıǵa táýeldilikti azaıtý strategııasyna saı keledi.
Sońǵy jyldary smartfon naryǵynyń ósim qarqyny báseńdep qalǵany belgili. Qurylǵylardyń tehnıkalyq múmkindikteri jetkilikti deńgeıge jetkendikten, tutynýshylar olardy jıi almastyrmaıdy. Mundaı jaǵdaıda óndirýshiler suranysty arttyrý úshin jańa dızaın men ınnovasııalyq sheshimderge júginýde.
Qazirgi tańda búkteletin telefondar segmentinde Samsung Galaxy Z, Huawei Mate X jáne Oppo Find N úlgileri tanymal. Zertteý agenttikteriniń deregi boıynsha, bul sanat 2023–2024 jyldary jylyna 20–25 mıllıonǵa jýyq satylym kórsetip, eń serpindi damyp kele jatqan baǵytqa aınaldy.
Apple bul naryqqa keıin qosylǵanymen, kompanııa árdaıym ónim sapasy men senimdiligine basymdyq beretindigimen erekshelenedi. Sarapshylardyń paıymynsha, búkteletin iPhone qoldanysqa shyqsa, ol jańa standart qalyptastyryp, tutynýshylardyń qyzyǵýshylyǵyn kúsheıtýi yqtımal.
Qurylǵynyń dızaıny jaıly naqty derek joq. Degenmen boljam boıynsha eki nusqa qarastyrylýda: yqsham qaltafon túri nemese planshet pen smartfondy biriktiretin úlken format. Apple úshin basty artyqshylyq – óz ekojúıesi. Jańa úlgi iPad pen MacBook arasyndaǵy úılesimdi baılanysty nyǵaıtyp, jumys jáne oıyn-saýyq úshin qosymsha múmkindikter usyna alady.
Boljamdarǵa súıensek, búkteletin iPhone 2026 jylǵa qaraı Apple-dyń jetkizilim kólemin shamamen 10 paıyzǵa arttyrýy yqtımal. Sonymen qatar óndiristiń Úndistanǵa aýysýy kompanııaǵa geosaıası táýekelderdi azaıtyp, shyǵyndardy tıimdi basqarýǵa jol ashady.
Kópten kútken jańa iPhone naryqqa jol tartsa, bul smartfon ındýstrııasynda jańa dáýirdiń bastalǵanyn bildirýi múmkin. Sarapshylardyń pikirinshe, Apple-dyń batyl qadamy premıým-klass segmentindegi básekeni kúsheıtip, tutas naryqtyń damý baǵytyn ózgertedi.