Aqmola oblysynda qazirdiń ózinde 5 mıllıon tonna astyq jınaldy. Bul — egin orý jumystary ázirge tek 70 paıyz alqapta, ıaǵnı úsh mıllıon gektardan astam jerde ǵana júrgizilgenine qaramastan qol jetkizilgen kórsetkish. Ishki saıasat basqarmasynyń málimetinshe, bıylǵy ónim rekordqa jaqyn jáne byltyrǵy kórsetkishten asyp túsýi múmkin, dep habarlaıdy Egemen.kz.
Agrarlar qyzý qarqynmen jumys istep jatyr. Vedomstvo atap ótkendeı, bıylǵy jıyn-terim sońǵy jyldardaǵy eń aýqymdy naýqandardyń birine aınalýy yqtımal. О́tken jyly jalpy nátıje 6 mıllıon tonnany quraǵan edi. Oblysta bıyl bul mejeden asatynyna senim mol.
Oblystyq aýyl sharýashylyǵy basqarmasynyń aqparaty boıynsha, ortasha ónimdilik gektarynan 15,6 sentner deńgeıinde saqtalýda. Munda tek kólem ǵana emes, sapa da mańyzdy: bıdaıdyń 70 paıyzdan astamy úshinshi klasqa sáıkes keledi. Bul elimizdiń qoımasyna ishki de, syrtqy naryqta suranysqa ıe joǵary sapaly astyq túsip jatqanyn bildiredi.
Mundaı qarqyn keshendi qoldaý sharalary men agrosektordaǵy tehnologııalyq ózgeristerdiń arqasynda múmkin boldy.
«Bıyl óńirde mıneraldy tyńaıtqysh engizý kólemi úsh esege artyp, 336 myń tonnaǵa jetti. Bul — 2023 jylǵy kórsetkishten úsh ese joǵary. Sondaı-aq maıly daqyldar alqaby da aıtarlyqtaı ósti: eger eki jyl buryn olardyń aýmaǵy 200 myń gektardan az bolsa, bıyl alǵash ret 495 myń gektardan asty», dep habarlady salalyq vedomstvo.
Tehnıkany jańartýǵa erekshe kóńil bólindi. Jyl basynan beri agrarshylar 1400-den astam aýyl sharýashylyǵy mashınasyn satyp aldy, bul byltyrǵydan bir jarym ese kóp. Búginde oblys alqaptarynda 7 myńnan astam kombaın jumys istep tur, onyń ishinde 5 myńǵa jýyǵy – zamanaýı ári ónimdiligi joǵary tehnıka. Bul tehnıkalyq serpilis ónimdi jınaý qarqynyn arttyrýǵa ári shyǵyndy azaıtýǵa múmkindik berdi.
«Fermerlerge 94 myń tonnadan astam jeńildetilgen dızel otyny belgilengen baǵamen bólindi, onyń taratylýy qatań keste boıynsha júrgizilýde. Naýqan barysynda JJM jetkizýde eshqandaı másele tirkelmedi. О́nimdi 4,3 mıllıon tonna jalpy syıymdylyǵy bar 66 lısenzııalanǵan elevator qabyldap jatyr. Sonymen birge aýyl sharýashylyǵy óndirýshileriniń ıeliginde taǵy 2,9 mıllıon tonnaǵa jýyq astyq saqtaıtyn 1,5 myńnan astam qoıma bar. Jalpy saqtaýdyń aımaqtyq kólemi 7 mıllıon tonnadan asady. Dán keptirý úshin táýligine 230 myń tonnadan astam ónim óńdeı alatyn 264 keptirgish iske qosylǵan», dedi aýyl sharýashylyǵy basqarmasy.
Oblystyq ishki saıasat basqarmasynyń dereginshe, Aqmola oblysy maýsymdy zor nátıjemen ári joǵary kóńil-kúımen aıaqtap keledi. Jınalǵan 5 mıllıon tonna — shekti meje emes. Ár kún saıyn óńirlik elevatorlarǵa júzdegen myń tonna jańa ónim qosylyp jatyr. Agrarlar bıylǵy jıyn-terim byltyrǵydan asyp túsetinine jáne oblystyń eldiń basty astyq beldeýi retindegi ornyn nyǵaıta túsetinine senimdi.