Memlekettik kúzet qyzmetiniń uıymdastyrýymen 2025 jylǵy 25–26 qyrkúıekte Astana qalasynda kúshtik qurylymdardyń FPV-dron operatorlary arasynda «Military Drone Race 2.0» týrnıri ótedi, dep jazady Egemen.kz.
Bul saıys pılotsyz avıasııalyq júıelerdi (PAJ) jaýyngerlik jáne kásibı daıarlyqta qoldanýdy damytýǵa, ony kıbersport elementterimen jáne jańa tehnologııalarmen ushtastyrýǵa baǵyttalǵan. Sonymen qatar, bólimshelerdiń tehnıkalyq áleýetin arttyrýǵa, mamandardyń kásibı deńgeıin kóterýge, olardyń tájirıbe jáne bilim almasýyn qoldaýǵa múmkindik beredi.
Júldeli oryndar úshin memlekettik kúshtik qurylymdardyń FPV-dron operatorlarynan quralǵan 14 komanda baq synaıdy. Týrnır baǵdarlamasy birneshe jattyǵýdy qamtıtyn eki kezeńnen turady.
Aıta keteıik, kúshtik qurylymdar arasyndaǵy mundaı jarys ekinshi ret uıymdastyrylyp otyr. Alǵashqy týrnır 2025 jyldyń sáýirinde ótken bolatyn. Onyń jeńimpazdary qatarynda QR Memlekettik kúzet qyzmetiniń, QR UQK «A» arnaýly maqsattaǵy qyzmetiniń jáne Radıoelektronıka jáne baılanys áskerı-ınjenerlik ınstıtýtynyń komandalary bolǵan edi.