Qyzyljar óńiriniń dıqandary bıylǵy oraqta tamasha nátıjege jetip otyr. Keıbir ozyq sharýashylyqtar arpany gektarynan 40,5, bıdaıdy 41,5 sentnerden alǵan. Máselen, jylyna 10 myń gektar jerge egin salatyn «Novomıhaılovskıı-2003» JShS basshylyǵynyń aıtýynsha, mundaı jetistikke barlyq agrotehnıkalyq sharany jiti atqarǵandyqtan jetken.
«Qazir barlyq alqaptyń 50 paıyzyna jýyǵyn bastyryp boldyq. Oraqty 4 tamyzda bastaǵan edik. Aldymen burshaq pen jasymyqty jınap aldyq. Bular qazir úlken suranysqa ıe, baǵalary da jaqsy. Byltyr arpanyń ónimdiligi gektaryna 30 sentner bolǵan, bıyl mine, 40,5 sentnerge jetti. Bıdaı da byltyrǵydan 4 sentnerge joǵary. Mıneraldy tyńaıtqyshtardy ýaqytynda jetkizip, jaz kúnderi jasalatyn agrotehnıkalyq sharalardy da mezgilinde oryndadyq. Onyń ústine, Úkimettiń bergen kómeginiń arqasynda jappaı ozyq tehnıkalarǵa qoljetkizdik. Mysaly, bıyl jasandy ıntellekt júıesi ornatylǵan eki kombaın satyp aldyq. Sapasy óte jaqsy, kabınalarynyń jaılylyǵy da keremet», deıdi sharýashylyq basshysy Vıacheslav Shegolev.
Onyń sózinshe, mınıstrlik kóktemgi dala men kúzgi oraq jumysyna edáýir arzandatylǵan dızel otyn beripti. Onyń da kómegi orasan. «Keń Dala-2» arqyly qarjylandyrý 2,5 ese artyp, 104,4 mlrd teńgege jetken. 37 mlrd teńgesi «Soltústik» ÁKK» AQ arqyly berilse, qalǵanyn «QazAgroQarjy» AQ bólipti. Oblystyq aýyl sharýashylyǵy basqarmasy bıyl ortasha gektar túsimi 16,5 sentnerden aınalady dep boljaıdy.
Búginge deıin oblys kóleminde 1 mln 100 myń gektardaı jerdiń astyǵy alyndy.
Soltústik Qazaqstan oblysy