Aýyl múmkindigin arttyrý mindeti

«Eldiń ekonomıkalyq áleýetin arttyrý, jańa múmkin­dikterge jol ashý maq­satynda aýdanymyzda keshendi sharalar tizbegin qolǵa aldyq. Mem­leket basshysy Joldaýda: «Investısııa tartý – ortalyq atqarýshy organdardyń ǵana mindeti emes. Osy mańyzdy jumysqa jergilikti bılik te atsalysyp, bári jumyla jumys isteýge tıis» dep atap ótken edi. Sondyqtan búgingi forým – aýdanymyzdyń áleýetin tanytyp, jańa seriktestikterge jol ashatyn, ortaq maqsatqa qol jetkizýge arnalǵan tıimdi alań boldy», deıdi Qaztalov aýdanynyń ákimi Aslanbek Sarqulov.

Batys Qazaqstan oblys­tyq kásipkerlik jáne ındýs­trıaldyq-ınnovasııalyq da­mý basqarmasynyń basshy­sy Nurjan О́tep­baevtyń aıtýynsha, memlekettiń júıeli qoldaýy arqasynda oblysta bıyl jyl basynan beri jumys istep turǵan shaǵyn jáne orta kásipkerlik nysandarynyń sany ­1,8%-ǵa artyp, 59 153 birlikke jetipti. Qa­zir bul salada jalpy sany 120,3 myń ­adam qyzmet etip, nápaqa taýyp júr. Úde­ris Qaztalov aýdanynda da jaqsy júrip ja­tyr. Ony osy forým aldynda uıymdasty­ryl­ǵan jergilikti kásipkerlerdiń ónim­deri ­kórme­sinen de baıqadyq.

Mysaly, «Qabyǵalıev» jeke kásipker­liginiń jetekshisi Aqylbek Qabdyǵalıev «Aýyl amanaty» baǵdarlamasy aıasyn­da nesıe alyp, Qaztalov aýylynda sha­tyrǵa qajetti qo­salqy bólshekter óndi­rý­ge kiris­ken. Aıaýjan Samıǵol­la­qyzy Qara­oba aýylynda et ónimderi men shu­jyq shy­ǵara bas­taǵan. Birik aýyldyq okrý­ginde qus sharýa­shylyǵyn qolǵa alǵan «Manas» jeke ká­sip­kerliginiń jetekshisi Manas Asylhanulynyń eńbegi de maqtaýǵa turarlyq.

Forýmnyń plenarlyq otyrysynda mem­lekettik qoldaý tetikteri men kásip­kerlikti damytý jaıynda da keńinen aıtyldy.

Aýdanda aýyl sharýashylyǵy men kásip­ker­lik salada jemisti eńbek etip júrgen azamat­tar az emes. Aqpáter aýyldyq okrý­ginde ekpeshóp ósirip, mal azyǵyn alyp jat­qan «Er-Qoja» sharýa qojalyǵynyń jetek­shisi, oblystyq máslıhat depýtaty Samat Hasanov, Qa­raoba aýyldyq okrýginde da­ıyn ónim óndirýge memleketten qaıtarymsyz grant alyp, kásibin dóńgeletken «Daıar» jeke kásipkerliginiń negizin qalaýshy Janaıdar Rysqalıuly, memle­kettik qaıta­rymsyz grant jáne «Aýyl amanaty» baǵ­dar­lamasy arqyly nesıe alyp qus sha­rýa­­shylyǵyn damytyp otyrǵan Manas Asylhanuly forýmda tájirıbesin ortaǵa saldy. Aqkól jaǵasynda demalys aıma­ǵyn quryp, qonaqúı salǵan Sultan Sartaev jańa kásibi ­týraly aıtyp berdi.

Aýylda ótken ınvestısııa forýmy aýyl ekonomıkasyn damytýǵa baǵyttalǵan jańa kezeń bolsa kerek. Bul jobalar júzege asqan jaǵdaıda aýyldyń ekinshi tynysy ashylyp, halyqtyń áleýmettik ahýa­ly jaqsarary sózsiz.

Batys Qazaqstan oblysy