Jyl saıyn elimizde keminde 1000 mektep jeti baǵyt boıynsha jańǵyrtýdan ótedi. Bul bastama aýyl men qala arasyndaǵy bilim sapasyndaǵy alshaqtyqty azaıtýǵa jáne balalardyń sapaly bilim alýyna qolaıly jaǵdaı jasaýǵa baǵyttalǵan. Jańǵyrtý jumystary jeti negizgi baǵyt boıynsha júzege asyrylady, dep jazady Egemen.kz.
Prezıdent 2024 jyldyń 2 qyrkúıegindegi Joldaýynda úsh jyl ishinde 1300 mektepterdi qaıta jańartýdy tapsyrǵan bolatyn.
Jańǵyrtý aıasynda kúrdeli jáne aǵymdaǵy jóndeý jumystary, pándik kabınettermen jabdyqtaý, mektep jıhazdaryn jańartý, kitaphanalar men ashanalardy, qaýipsizdik jaǵdaılary qarastyrylǵan.
«Osy oraıda Astana boıynsha 2025-2027 jyldarǵa 22 mektepti jańartý jospary bekitilgen. 2025 jyly 6 mektep kúrdeli jóndeýden ótti. Al 2026 jyly 8 mektep, 2027 jyly 8 mektep jańartýdan ótedi», dedi Astana qalalyq Bilim basqarmasynyń basshysy Qasymhan Senǵazyev.
Bilim basqarmasynyń málimetinshe, búgingi kúni Astana qalasy boıynsha jalpy bilim beretin 196 mektep bar, onyń 115-i – memlekettik, (onda 236 986 oqýshy bilim alyp júr), 45 014 balany qamtyǵan 74 jeke mektep jáne 6 myńnan astam oqýshyny oqytatyn 7 respýblıkalyq mektep, elorda boıynsha barlyǵy 288 279 oqýshyny qamtıdy.
Qasymhan Senǵazyulynyń aıtýynsha, bekitilgen josparǵa sáıkes 2025 jyly 6 mektep №1, №14, №21, №35, №61, №69 qaıta jańartylǵan.
Bul mektepter 2000 jyldarǵa deıin salynǵan jáne sońǵy 5 jylda kúrdeli jóndeýden ótpegen, sondaı-aq, olardyń materıaldyq-tehnıkalyq bazasy tozǵany anyqtalǵan.