Kostychevo selosynda uzaq jyldardan beri naýbaıhanashy bolyp isteıtin Svetlana Fılıýk aýyldastarynyń qurmetine bólengen eńbekqor adam, dep jazady Egemen.kz.
Naýbaıhanashy álemdegi qurmetti mamandyqtyń biri. Nan qadirin biletinder naýbaıhanashyny da qadir tutady. Svetlana Ivanovna osy selodaǵy kóp balaly otbasynda týyp ósti. Aýyldaǵy jumystyń qaı-qaısysy bolsyn ońaı emes, boıyńdaǵy bar qajyr-qaıratyńdy jumsap, tyrbanyp eńbek etýiń kerek. Ol úshin árıne, ushqan uıadaǵy tálim-tárbıeniń yqpaly bolatyndyǵy daýsyz. Ákesi Ivan Regeda mal azyǵyn daıyndaıtyn sehta eńbek etse, anasy Praskovıa Konstantınovna mal fermasynda jumys istedi. Oktıabrdiń elý jyldyǵy atyndaǵy mektepti bitirgennen keıin agrotehnıkalyq kolledjde bilim aldy. Oqýyn aıaqtar kezde jas qyzdy týǵan jeri qol bulǵap shaqyratyndaı. Etene tanys adamdar da, bal kúlkili balalyq shaǵy ótken, ózi úshin sondaı ystyq aýyldastary da oıynan shyqpaı júretin. Kolledjdi bitirgennen keıin esh oılanǵan joq, elge oraldy. Jas mamanǵa selodaǵy ashanada jumys isteý usynyldy. Talapty qyzǵa jańa mamandyqty ıgerýge týra keldi. Keıin naýbaıhanaǵa aýysty. Nan ıisi kókiregin qýanyshqa bólep, mereıin ósiretin jerde eńbek etý de qyzyq eken. Qabaryp pisken, dámi til úıiretin nandy pisirý úshin eń aldymen ynta kerek eken. Ynta bolsa, pisirgen nany da tutynýshylardyń kóńilinen shyǵyp jatady.
–Bólke nandy qolyńa alyp ustap kóresiń, – deıdi ol, – eger alaqanyńdy kúıdirip turmasa pisken, ottyń taby nannyń boıynan áli ketpese, onda shıki. Qalyptan sýyryp alǵan kezde barlyǵy aıqyndala túsedi.
Kórshileri áli tańǵy uıqynyń qushaǵynda jatqan kezde Svetlana nan pisire bastaıdy. Qalypty jumys yrǵaǵy. Kúnde nan pisirip júrse de ár kún saıyn sál-pál qobaljıtyny bar. Qalaı bolar eken degen bir saýal júregin tolqytyp turady.
Svetlana 1985 jyly osy selonyń turǵyny Vladımır Fılıýkpen nekelesken. Berekeli shańyraqta eki ul dúnıege keldi. Ilkiden jalǵasqan eńbekqorlyq uldaryna da juǵysty boldy. Sergeı tehnık-mehanızator, Vladımır qurylysshy, Vladımır, Tımofeı jáne Arsenıı esimdi nemereleri kóz qýantyp ósip kele jatyr.
–Ár adamnyń aldyna qoıǵan maqsat-muraty bolýy kerek, – deıdi keıipkerimiz, – sonda ǵana ómiriń tekke ótpeı, mazmundy bolmaq.
El syılaǵan eńbek adamynyń pikirine den qoıdyq.
Aqmola oblysy