Qazaqstanda tehnıkalyq jáne kásiptik bilim berý uıymdarynyń tıimdiligin arttyrýǵa baǵyttalǵan keń aýqymdy reforma bastaldy, dep habarlaıdy Egemen.kz Oqý-aǵartý mınıstrliginiń baspasóz qyzmetine silteme jasap.
Mınıstrliktiń málimetinshe, alǵashqy 30 kolledj korporatıvtik basqarý júıesine kóshýde. Jańa tásil oqý oryndarynyń basqarý modelin jetildirip, ashyqtyq pen tıimdilikti qamtamasyz etýdi kózdeıdi.
Sonymen qatar kolledjderdiń qarjylyq derbestigin keńeıtý baǵytynda da mańyzdy qadamdar jasalýda. Jan basyna shaqqandaǵy qarjylandyrýdyń dıfferensıaldy ádistemesi engizilip, 2025–2026 oqý jylynda bir stýdentke bólinetin qarjy kólemi ortasha eseppen 437 myń teńgeden 912 myń teńgege deıin arttyryldy. Kolledjder tórt lıgaǵa bólinip, arnaıy aqparattyq júıe arqyly avtomatty túrde baǵalanady. Ár lıgaǵa basqarý, yntalandyrý jáne qoldaý boıynsha dıfferensıaldy tásilder qoldanylady.
Kadrlyq áleýetti arttyrý da reforma aıasyndaǵy negizgi basymdyqtardyń biri. «Bilim berýdegi ózgeristerdiń 1000 kóshbasshysy» jobasy boıynsha 50 kolledj dırektory kásibı oqytýdan ótip, jańa býyn basshylarynyń pýly qalyptastyryldy. 2025 jyly 5770 pedagog biliktilikti arttyrý kýrstarynan ótýde. Onyń ishinde 2000-y óndiris oryndarynda tájirıbeden ótedi. Sonymen birge pedagogtardyń quzyretterin sertıfıkattaý júıesi engizilip, 2027 jyldyń sońyna deıin shamamen 10 000 pedagogty daıarlaý jáne sertıfıkattaý josparlanǵan.
Jańa bastamalardyń biri – pedagogtarǵa arnalǵan óndiristik praktıka men tálimgerlik júıesiniń engizilýi. Oqytýshylar jetekshi kásiporyndardyń óndiristik alańdaryna jiberilip, salanyń jańa tehnologııalary men talaptarymen tanysady. Tájirıbeli óndiris sheberleri men jetekshi oqytýshylar jas pedagogtarǵa tálimgerlik etedi. Bul sharalar kolledjderde tájirıbege baǵyttalǵan oqytýdy damytýǵa, zamanaýı ekonomıkanyń suranysyna saı jańa býyn kadrlardy daıarlaýǵa jol ashady.