Búgin Qyzylordada oblys ákimi Nurlybek Nálibaevtyń qatysýymen oblys ákimdigi jáne Qazaqstannyń Azamattyq Alıansymen birlesip uıymdastyrýymen «Aýyldyq aımaqtardy damytýdaǵy azamattyq qoǵamnyń róli» atty azamattyq forým ótti, dep jazady Egemen.kz.
Oǵan Parlament Senatynyń depýtaty Naýryzbaı Baıqadamov, Májilis depýtaty Murat Ábenov, Qazaqstannyń Azamattyq alıansy prezıdenti Baný Nurǵazıeva, Mádenıet jáne aqparat mınıstrliginiń Azamattyq qoǵam isteri komıteti tóraǵasynyń orynbasary Janargúl Áljanova, «Qazaqstan halqyna» qoǵamdyq qorynyń basqarma tóraǵasy Lázzat Shyńǵysbaeva, Ortalyq Azııadaǵy Eýrazııa qorynyń dırektory Rınad Temirbekov, elimizdiń birqatar óńirinen qonaqtar men jaýapty sala basshylary qatysty.
Aımaq basshysy azamattyq sektor halyq pen bıliktiń arasynda altyn kópirge aınalǵan ortaq alań ekenin aıtty.
«Búginde elimizdiń damýyn aıqyndaıtyn kórsetkishterdiń biri – azamattyq sektor. Memlekettiń tabystylyǵy úkimettik emes uıymdardyń jemisti ári tıimdi qyzmetine tikeleı baılanysty.
Prezıdentimiz Qasym-Jomart Kemeluly halyqqa arnaǵan Joldaýynda: «Azamattyq qoǵamǵa qoldaý kórsetip, onyń áleýetin nyǵaıta túsý kerek. Sondaı-aq, asa mańyzdy jalpy memlekettik mindetterdi sheshý úshin talqylaý jumystaryna azamattyq qoǵamnyń múmkindikterin keńinen qoldaný qajet»,– dep atap ótken bolatyn.
Táýelsizdiktiń alǵashqy jyldarynda aımaǵymyzda 15 qoǵamdyq uıym bolsa, búginde olardyń qatary myńǵa jýyqtady. Onyń 300-i óńirimizdiń qoǵamdyq-saıası, mádenı-rýhanı ómirine belsendi aralasýda. Bul qoǵamda azamattyq jaýapkershilik pen belsendiliktiń artqanyn aıqyn kórsetedi.
Barlyq aýdanda úkimettik emes uıymdarmen ózara is-qımyl jáne yntymaqtastyq jónindegi keńester, júzege asyrylatyn jobalardyń tıimdiligi men ózektiligin baǵalaıtyn sarapshylyq toptar jumys isteıdi. Ákimdikter janyndaǵy keńester men komıssııalardyń jumysyna 190 úkimettik emes uıym ókili belsendi qatysady.Jyl saıyn memlekettik tapsyrys arqyly azamattyq qoǵam ınstıtýttaryna qarjylaı qoldaý kórsetilip keledi. 2023-2025 jyldary memlekettik áleýmettik tapsyrys aıasynda bıýdjetten 3 mlrd. 684 mln. teńge qarajat bólinip, 427 áleýmettik joba iske asyrylýda, 3 myń adam jumyspen qamtylǵan. Áleýmettik jobalardyń 200-ge jýyǵy aýyl turǵyndarynyń qatysýymen uıymdastyryldy. Basym bóligi halyqtyń áleýmettik osal toptaryna kómek kórsetýge, qoǵamdyq kelisimdi, ulttyq birlikti nyǵaıtýǵa, halyqty jumyspen qamtýǵa járdemdesýge baǵyttalǵan.
Qoǵamdyq qaýymdastyqtyń kóshbasshylary retinde bárińizdi Ádiletti, Taza, Qaýipsiz Qazaqstandy qurý jolynda halyqtyń birligin arttyrýǵa, egemen elimizdiń jarqyn bolashaǵyna birlese qyzmet etýge shaqyramyn!», – dedi N.Nálibaev.
Basqosýda N.Baıqadamov, M.Ábenov, R.Temirbekov, L.Shyńǵysbaeva, J.Áljanova, B.Nurǵazıeva sóz sóılep, azamattyq qoǵam ınstıtýttarynyń mańyzdylyǵyna toqtaldy.
Sondaı-aq, óńirdiń ósip-órkendeýine úles qosqan azamattarǵa oblystyń Qurmet gramotasy, oblys ákiminiń, Qazaqstannyń Azamattyq alıansy tóraıymynyń Alǵys haty tabystaldy.
Forýmǵa deıin Syrdarııa aýdanynyń Naǵı Ilııasov, Besaryq aýyldarynda seksııalyq otyrystar ótkizildi. Onda aýyldyń áleýmettik máselelerin sheshý, turǵyndardyń ómir súrý sapasyn jaqsartý, qoǵamdyq baqylaý júrgizýge úkimettik emes uıymdardy tartý máseleleri qozǵaldy. ÚEU týraly jańa zań jobasy talqylanyp, tıisti usynymdar qabyldandy.