Premer-mınıstr Eńbek kúnine arnalǵan «Eńbek adamy – El maqtanyshy» respýblıkalyq forýmyna qatysty. Oljas Bektenov Memleket basshysynyń atynan el ekonomıkasyn nyǵaıtýǵa jáne damytýǵa úles qosqan jumysshy mamandyqtary ókilderine memlekettik nagradalar tabystady, dep habarlaıdy Egemen.kz.
Forýmǵa qatysýshylarǵa arnap sóılegen sózinde Premer-mınıstr Prezıdenttiń Ulttyq quryltaıda belgilep bergen «Adal adam – Adal eńbek – Adal tabys» qaǵıdaty búginde Qazaqstan qoǵamynyń damýyndaǵy basty baǵytyna aınalǵanyn atap ótti.
Qazaqstanda Eńbek kúni on jyldan astam ýaqyttan beri atalyp keledi. Bıylǵy Jumysshy mamandyqtary jyly aıasynda bul merekeniń mańyzy artyp, qoǵam damýynyń negizi sanalatyn adal eńbekke qurmettiń belgisine aınaldy. Qazir elimizde shamamen 2,5 mln maman eńbek etedi. Olardyń qatarynda shahterler, metallýrgter, pedagogtar, energetıkter, medısına qyzmetkerleri, qurylysshylar, agronomdar, tehnologter jáne basqa da sala ókilderi bar.
Úkimet jumysshy mamandyqtary ıelerine árdaıym jan-jaqty qoldaý kórsetip keledi. О́ndiristegi eńbek jaǵdaıy jaqsartylyp, ondaǵy úderister avtomattandyrylýda. Tehnıkalyq bilim berý júıesi reformalanyp, kásibı standarttar jańartylýda. Ǵylym men óndiris arasyndaǵy baılanys nyǵaıyp keledi.
Jumysshy mamandyqtaryna arnap jaıly jaǵdaı jasaý baǵytyndaǵy mańyzdy qadamnyń biri – Prezıdent bastamasymen Otbasy bankinde arnaıy «Naýryz jumysker» baǵdarlamasynyń iske qosylǵany boldy. Búginde bul baǵdarlama arqyly 2 myńnan astam otbasy baspanaly boldy.
Sonymen qatar elimizde sıfrlyq tehnologııalardy damytý – erekshe nazarda.
«Memleket basshysy Qazaqstannyń bolashaǵyn ınnovasııalyq damý jolynda kóredi. Ol halyqqa Joldaýynda aýqymdy sıfrlandyrýdy jáne jasandy ıntellektini belsendi engizýdi basymdyq retinde aıqyndady. Aldyńǵy qatarǵa jańa tehnologııalar shyǵady. Bul – ekonomıkalyq ósimge jáne azamattardyń ómir sapasyn odan ári jaqsartýǵa keń múmkindik. Innovasııalyq sheshimder ónerkásipke, kólik salasyna, medısınaǵa, bilim berýge jáne basqa da kóptegen salalarǵa engizilýde. Barlyq jasalyp jatqan sharalar qýatty Sıfrlyq Qazaqstandy qalyptastyrýǵa baǵyttalǵan», — dep atap ótti Oljas Bektenov.
Úkimet júrgizip otyrǵan sıfrlyq progreske qol jetkizý jumystary aıasynda kadrlardy daıarlaý jáne kásibı-tehnıkalyq bilim berýdi damytý basty nazarda bolyp otyr. Bıyl 9-synyp túlekteriniń 100%-y geologııa, mashına jasaý, energetıka, kólik, IT jáne basqa da suranysqa ıe mamandyqtar boıynsha kolledjderde tegin bilim alýmen qamtyldy. Sońǵy eki jylda stýdentterdiń shákirtaqysy eki esege ósti. Kolledjderde materıaldyq-tehnıkalyq baza jańartyldy, stýdentterdiń jataqhanamen qamtylýy shamamen 90%-ǵa jetti.
Úkimet azamattarǵa jańa daǵdylardy ıgerýge jáne básekege qabilettilikti arttyrýǵa barlyq jaǵdaıdy jasaýǵa múddeli. Eldiń barlyq óńirinde bilim berý mekemeleri men óndiris oryndary arasyndaǵy yntymaqtastyq nyǵaıyp keledi. Kolledjderdi qamqorlyqqa alǵan kásiporyndardyń sany 8 ese artty, bıznespen jasalatyn dýaldy kelisimsharttar sany 2 ese kóbeıdi.
Is-shara barysynda Halyqaralyq eńbek uıymynyń bas dırektory Jılber Fossýn Hýngbo forým qatysýshylaryna beıneúndeý joldady. Ol áleýmettik dıalogty qamtamasyz etýde jáne eńbek naryǵynyń ınklıýzıvti ári turaqty damýyna járdemdesýde sheshýshi ról atqaratyn jumys berýshiler men qyzmetkerlerdiń ókildi uıymdarynyń mańyzdylyǵyn atap ótti. Onyń aıtýynsha, búgingi tańda áleýmettik seriktester osy dıalogty damytyp, ári qaraıǵy qadamdardy anyqtap, birlesip jumys isteýdi jalǵastyrýda.
Sondaı-aq «PARYZ» Ulttyq jumys berýshiler konfederasııasy prezıdıýmynyń tóraǵasy Jumabek Janyqulov sóz sóıledi.
Forým aıasynda uıymdastyrylǵan kórmede Premer-mınıstr qazaqstandyq ónerkásip kásiporyndarynyń óndiris prosesine ozyq tehnologııalardy engizý boıynsha júrgizip jatqan jumystarymen tanysty. «QARMET», «Qazaqmys», «Qazsınk» jáne ERG kompanııalary joǵary tehnologııalyq salalarǵa arnalǵan metallýrgııalyq ónim shyǵarý, óndiristerde monıtorıng júıesin engizý, baıytý fabrıkalarynyń sıfrlyq úlgilerin jasaý jáne taǵy da basqa jobalaryn tanystyrdy. Bıznestiń bastamalary óndiris úderisterin «aqyldy» basqarýǵa jáne barynsha tıimdilikke qol jetkizýge, sondaı-aq kolledjderdi qoldaý arqyly kásibı kadrlardy daıarlaýǵa, onda zamanaýı oqý kabınetteri men sheberhanalardy ashýǵa baǵyttalǵan.
Forým qorytyndysy boıynsha jumysshy mamandyqtary ókilderine memlekettik nagradalar tabystaldy.
Marapattaldy:
«Qurmet» ordenimen
Bahtarbek Júnisov – «Qazaqstan temir joly» UK» AQ «Magıstraldyq jeli dıreksııasy» fılıaly Jol jáne qurylystar departamentiniń zeınetkeri;
Aqmaral Aýǵanova – «KAP Technology» JShS býhgalterlik esep jáne eseptilik departamentiniń menedjeri.III dárejeli «Eńbek Dańqy» ordenimen
Shaıhyman Shonanov – «KAZ Minerals Bozshakol» JShS býldozer mashınısi;
Baný Ońalbaeva – «Qazposhta» AQ Jetisý oblysy boıynsha fılıaly Kerbulaq aýdandyq poshta baılanys torabynyń Ortalyq operasııalyq ýchaskesiniń basshysy;
Nına Mıroshnıchenko – «Haıdelberg Materıalz Qazaqstan» JShS logıstıka jónindegi menedjeri;
Nurádil Meshanov – «Topar bas energııa taratý stansııasy» JShS qazandyq mashınısi;
Gennadıı Obrazsov – «Qostanaı mıneraldary» AQ ekskavator mashınısi;
Gúlzııa Avdıkerim – «Qarmet Service»JShS tiginshisi;
Toqtar Janaev – «Altyntau Kokshetau» AQ Kólik basqarmasynyń kólikti shyǵarý jónindegi mehanıgi;
Jarylqasyn Quraıyshov – «Taraz metallýrgııa zaýyty» JShS «Metall óńdeý» sehynyń, mehanıkalyq óńdeý ýchaskesinde 6 razrıadty tokary.