Abaı oblysynyń ákimi Berik Ýálıdiń tapsyrmasymen oblys ákiminiń orynbasary Meıirlan Rahanov jumys saparymen Reseı Federasııasynyń quramyndaǵy Karelııa Respýblıkasyna bardy. Sapar aıasynda eki óńir arasynda yntymaqtastyqty nyǵaıtýǵa baǵyttalǵan memorandýmǵa qol qoıyldy.
Qujat Qazaqstan Respýblıkasy men Reseı Federasııasy arasyndaǵy dostyq pen áriptestikke negizdelgen kelisimderge súıene otyryp, Abaı oblysy men Karelııa Respýblıkasynyń saýda-ekonomıkalyq, ǵylymı-tehnıkalyq, gýmanıtarlyq, áleýmettik jáne mádenı salalardaǵy baılanystaryn damytýǵa jol ashady.
Memorandým aıasynda ınvestısııalar tartý, qurylys pen logıstıka, shaǵyn jáne orta kásipkerlik, aýyl sharýashylyǵy salalarynda ózara is-qımyl jasaý, ónerkásip, onyń ishinde jeńil, taý-ken, óńdeý, tamaq, metallýrgııa jáne orman ónerkásibi, bilim berý salalarynda yntymaqtastyq ornatyp, oqý oryndary arasynda tikeleı baılanysty nyǵaıtý, pedagogtar men stýdentterdiń tájirıbe almasýy, mádenıet, densaýlyq saqtaý, týrızm, sport, áleýmettik qorǵaý salalarynda birlesken jobalardy júzege asyrý qarastyrylǵan.
Sonymen qatar taraptar birlesken baǵdarlamalar men is-sharalar josparlaryn ázirleý, ortaq jobalardy júzege asyrý, kórmeler men jármeńkelerge qatysý, aqparatpen almasý jáne ózara delegasııalar jiberý múmkindikterin qarastyrýǵa ýaǵdalasty.
Sondaı-aq, oblys ákiminiń orynbasary Karelııanyń delegasııasyn 2026 jyldyń birinshi toqsanynda Abaı oblysyna saparmen kelýge shaqyrdy.