Biryńǵaı jınaqtaýshy zeınetaqy qorynan (BJZQ) qarajatty zańsyz shyǵarý faktileri boıynsha jınaq ıelerine jaýapkershilik júktelmeıdi. Bul týraly Qarjylyq monıtorıng agenttigi tóraǵasynyń orynbasary Jeńis Elemesov málimdedi, dep habarlaıdy Egemen.kz.
Aıtýynsha, qazaqstandyqtarǵa eshqandaı aıyp taǵylmaıdy. Sebebi olar óz jınaqtaryn paıdalanǵan. Degenmen zeınetaqy qarajatyn merziminen buryn alý faktisi bolǵanymen, qylmystyq jaza tek alaıaqtyq shemany uıymdastyrǵan taraptarǵa qoldanylady.
Azamattarǵa kiná artylmaıdy. Olar ózderiniń qarjysyn aldy. Biraq BJZQ qarajatyn zańsyz shyǵarý isine tikeleı qatysqan stomatologııalyq klınıkalar men uıymdastyrýshylar jaýapqa tartylady, – dedi Jeńis Elemesov.
Agenttiktiń málimetinshe, memlekettik zeınetaqy qoryndaǵy qarjy negizinen tis emhanalary arqyly zańsyz alynǵan. Keminde bes top ókilderi jetkiliktilik sheginen asqan jınaqtary bar azamattardy taýyp, qyzmetin jarnamalaǵan.
Kelisimge kelgen klıentterge memlekettik emhanalardyń dárigerlik-konsýltatıvtik komıssııalary «zeınetaqy jınaǵy esebinen stomatologııalyq em qajet» degen jalǵan qorytyndy daıyndaǵan. Al jeke klınıkalar quny 17 mıllıon teńgege deıin jetetin qymbat sheteldik plomba ornatylǵany týraly jalǵan qujattar men túbirtekter bergen.
Osy negizde zeınetaqy qarjysy sheshilip, deldaldar onyń shamamen 30 paıyzyn óz úlesi retinde alǵan. Qalǵan soma jınaq ıelerine qolma-qol aqsha túrinde berilip otyrǵan.