Qazaqstan kınoındýstrııasynda jańa tarıhı jetistik tirkeldi. Rejıssıor Dýman Erkimbektiń debıýttik tolyqmetrajdy «QAITADAN» fılmi prokatqa shyqqan úsh aptanyń ishinde 1 mlrd teńgeden astam tabys jınap, memleketten bólingen qarajatty bes esege artyǵymen qaıtarǵan alǵashqy joba atandy, dep habarlaıdy Egemen.kz.
Kórermen kózaıymy bolǵan «QAITADAN» kınosy oqıǵa jelisimen ǵana emes, vızýaldy qýatymen de baýraıdy. Bul fılm – kórkem shyǵarma ǵana emes, shynaıy sezimge negizdelgen, tereń dramalyq mazmundaǵy týyndy. Kıno astarynda qaýipsizdik, jaýapkershilik pen birlik jaıly tereń oı tastaıtyn ári jastardy dostyqqa, baýyrmaldyqqa jeteleıtin tustary bar. Ár dıalog – búgingi qoǵamǵa oı salady, ár kórinis – kórermenniń júregine jaqyn.
Fılmde otbasy ınstıtýty dáriptelip, áleýmettik jaýapkershilik pen adamgershilik qaǵıdattary kórinis tabady. Sebebi ózińdi ǵana emes, aınalańdy, tipti tutas qoǵamdy qutqarýǵa umtylý – ár adamnyń mindeti.
«QAITADAN» - qazaq kınosynyń jańa beleske kóterilgenin kórsetetin eńbekterdiń biri. 2023 jyly pıtchıng jeńimpazy atanǵan bul joba QR Mádenıet jáne aqparat mınıstrligi jáne Ulttyq kınony qoldaý memlekettik ortalyǵynyń qoldaýymen túsirilgen bolatyn.
Kıno – bekzat óner. Qoǵamda alar orny erekshe. Búginde Qazaqstannyń kınoındýstrııasy Mádenıet jáne aqparat mınıstri Aıda Balaevanyń jiti basshylyǵymen qarqyndy damyp keledi. Bul ulttyq kontentti ilgeriletýge, turaqty qoldaý júıesin qalyptastyrýǵa jáne halyqaralyq yntymaqtastyqty keńeıtýge múmkindik berip otyr.
«Bul – elimizde jas rejıssıorler men debıýttik jobalarǵa naqty múmkindik berilip otyrǵanynyń jarqyn kórinisi. Rejısser Dýman Erkimbek, prodıýser Jalyn Tileýbergen syndy jańa tolqynnyń bastaýy. «QAITADAN» - osynyń aıqyn dáleli. Mundaı sapaly jobanyń halyqqa keńinen tanylyp, kórermenniń kóńilinen shyǵýy júıeli jumysymyzdyń nátıjesi», deıdi Ulttyq kınony qoldaý memlekettik ortalyǵynyń Basqarma tóraǵasy Qurmanbek Jumaǵalı.
Barsha kórermenderdi otandyq kınony qoldap, «QAITADAN» fılmin kınoteatrlarda tamashalaýǵa shaqyramyz!
Sońǵy eki jylda otandyq kınoındýstrııada birqatar mańyzdy reformalar júzege asty. Solardyń ishinde asa mańyzdylarynyń biri – konkýrstyń jańa erejesi. Reformanyń negizgi maqsaty – ádilettilik pen ashyqtyqty qamtamasyz etý, sondaı-aq kınogerler úshin konkýrsqa qatysý prosesin barynsha jeńildetý.
Saraptama keńesiniń daýys berý mehanızmi de jańartyldy. Keńes músheleri - ár jobanyń ssenarııinen bastap, óndiriske deıingi kezeńdi súzgiden ótkizedi. Tildiń tazalyǵyna da aıryqsha mán beredi. Osynyń arqasynda debıýttik jobalarǵa erekshe nazar aýdarylyp, jas rejısserlerdiń týyndylaryna senim kúsheıdi.
Irikteýden ótken kınojobalar óndiriske jiberilip, úlken ekranǵa deıin tolyq súıemeldenedi. Bul úshin Ortalyqta ár jobaǵa jeke menedjer taǵaıyndalǵan.
Bıyldyń ózinde 12 ulttyq fılm úlken ekranǵa shyqty.
Eń bastysy – san emes sapa basty nazarda! Otandyq fılmder kórermenge barynsha qoljetimdi bola bastady. Sońǵy jyldary arhıvte jatqan barlyq fılmder prokatqa shyǵarylyp, qalyń kórermenge usynyldy.
Ushaq borttarynan bastap strımıngtik platformalarǵa, telearnalardan shalǵaı aýyldardaǵy kórsetilimderge deıin – ulttyq kınony kórýge múmkindik artty.
О́ńirlerde «Qazaq kınosynyń onkúndigi» ótkizildi. Jańa týyndylar kópshiliktiń nazaryna ilikti.
Sonymen qatar «JARQYRA» respýblıkalyq kastıngi jarııalandy. Nátıjesinde anyqtalǵan jańa talanttardyń kásibı ósýin qamtamasyz etý jáne olardy ulttyq kınematografııanyń jańa jobalaryna tartý. Aımaqtardaǵy talantty jastardy qoldaýdyń arqasynda kıno áleminde jańa esimder men jańa lep bolýy haq.
Aıta keteıik, Ulttyq kınony qoldaý memlekettik ortalyǵynyń qoldaýymen túsirilgen týyndylar halyqaralyq deńgeıde de keńinen tanylyp keledi. Sońǵy derekterge sáıkes, qazaqstandyq fılmder 300 halyqaralyq kınofestıvalge qatysyp, 177 júlde jeńip aldy.
Bul aýqymdy jumystar ulttyq kınematografııanyń kókjıegin keńeıtip, ony ári qaraı damytýǵa, qazaq mádenıetin álemge tanytýǵa múmkindik beredi.
Kıno – óner, ol – ıdeologııa. Al ıdeologııanyń basty kúshi – sanaǵa tóńkeris jasaý, ıgi isterdi nasıhattaý.