Túrkistan qalasynda «Woosong University Kazakhstan» ýnıversıtetiniń saltanatty ashylýy ótti. Jańa joǵary oqý ornynyń ashylýy – Qazaqstan men Koreıa Respýblıkasy arasyndaǵy bilim jáne ǵylym salasyndaǵy strategııalyq yntymaqtastyqty tereńdetýdiń mańyzdy qadamy, dep jazady Egemen.kz.
Is-sharaǵa Premer-mınıstr orynbasary qyzmetin atqarǵan, qazirgi syrtqy ister mınıstri Ermek Kósherbaev, Koreıa Respýblıkasynyń Qazaqstandaǵy Tótenshe jáne О́kiletti Elshisi Chjo Te Ik, QR Ǵylym jáne joǵary bilim mınıstri Saıasat Nurbek, Túrkistan oblysynyń ákimi Nuralhan Kósherov, sondaı-aq «Výsong bilim qorynyń» Qurmetti tóraǵasy jáne basqarma múshesi Kım Son Kıong myrza qatysyp, quttyqtaý sóz sóıledi.
Ermek Kósherbaev óz sózinde fılıal ashýdyń tarıhı mańyzdylyǵyna toqtaldy:
«El Prezıdenti Qasym-Jomart Kemeluly Toqaevtyń tapsyrmasy boıynsha elimizde jetekshi sheteldik joǵary oqý oryndarynyń fılıaldaryn ashý jumystary júrgizilip jatyr. Qazirgi ýaqytta ártúrli formatta 40 strategııalyq áriptestik iske asyrylyp, onyń 33-i – sheteldik ýnıversıtet fılıaldary. Búgin biz tarıhı oqıǵanyń kýási bolyp otyrmyz – rýhanı baı ári kóne Túrkistan qalasynda Koreıa Respýblıkasynyń jetekshi ýnıversıtetiniń fılıaly ashyldy. Bul ýnıversıtet tek bilim berý alańy ǵana emes, halyqaralyq yntymaqtastyq, ınnovasııalar ortalyǵy jáne elimizdiń ıntellektýaldyq kapıtalyn qalyptastyratyn joǵary bilikti mamandar daıarlaıtyn meken bolady», dep atap ótti E. Kósherbaev.
Ǵylym jáne joǵary bilim mınıstri Saıasat Nurbek Qazaqstannyń Ortalyq Azııadaǵy jetekshi bilim berý habyna aınalýyna baǵyttalǵan jobalardyń mańyzdylyǵyn atap ótip, sheteldik joǵary oqý oryndarynyń elimizde fılıaldar ashýy osy strategııalyq maqsatqa jetýdiń mańyzdy bóligi ekenin aıtty. Mınıstr atap ótkendeı, jańa oqý jylynda esigin aıqara ashqan «Woosong University Kazakhstan» – osyndaı tabysty seriktestiktiń jarqyn úlgisi.
Memleket basshysynyń tapsyrmasy boıynsha Úkimet halyqaralyq bilim berý yntymaqtastyǵyn damytý, sheteldik ýnıversıtet fılıaldaryn ashý jáne stýdentter men oqytýshylardyń akademııalyq utqyrlyǵyn qamtamasyz etý baǵytynda júıeli jumystar júrgizip otyr. Aıta keteıik, Memleket basshysy Qasym-Jomart Toqaevtyń tapsyrmasy aıasynda Qorqyt Ata atyndaǵy Qyzylorda ýnıversıtetinde SeoulTech-pen birlesip Jasandy ıntellekt ınstıtýty ashyldy. Búginde Qazaqstan tarapy SeoulTech, Woosong, Dong-Eui, KAIST sııaqty jetekshi koreıalyq ýnıversıtettermen tyǵyz yntymaqtastyq ornatyp, elimizde alǵashqy sheteldik fılıaldar men ǵylymı-zertteý ortalyqtaryn ashyp, qos dıplomdy baǵdarlamalar men akademııalyq almasý jobalaryn iske asyryp jatyr.
Saltanatty is-shara barysynda «Woosong University Kazakhstan» dırektory Hva Chon Ion ýnıversıtettiń mıssııasy, negizgi bilim berý baǵdarlamalary, ǵylymı baǵyttary jáne halyqaralyq seriktestikteri týraly keńinen baıandady.
Is-shara aıasynda qurmetti qonaqtar ýnıversıtettiń «Tilekter kitabyna» qol qoıyp, jańa oqý ornynyń sıfrlyq kitaphanasy, oqý zaldary men zamanaýı aýdıtorııalarymen tanysty. Sondaı-aq stýdenttermen kezdesip, olardyń alǵashqy oqý kúnderine sáttilik tiledi.