Jeksenbide «Almaty marafony» ótti. Qala ákimdiginiń qoldaýymen uıymdastyrylǵan dástúrli jarysta álemniń 60-tan astam memleketinen kelgen 16 myńnan asa qatysýshy baq synady.
Jarys jolyna shyqqandar arasynda jas bala da, egde tartqan qarııalar da, kásipqoılar men áýesqoı sportshylar da kezdesti.
Áıelder arasyndaǵy marafonda Anastasııa Derkachtyń mereıi ústem boldy. Jeldeı júıtkip kele jatqan reseılik jelaıaq týra márege jaqyndaǵanda súrinip qulady. Janynda turǵan volonter oǵan kómek berýge áreket jasady. Biraq Anastasııa ony mańyna jaqyndatpady. Sebebi ondaı sátte sportshyǵa basqa bireý kómek kórsetetin bolsa, onda ol jarystan shettetiledi. Sóıtti de ózi ornynan turyp, máre syzyǵyn qıyp ótti. Derkachtyń ýaqyty – 2 saǵat 41 mınýt 24 sekýnd. Bul – «Almaty marafonynyń» jańa rekordy. Kúmis júldeni jeńimpazdyń otandasy Elena Tolstyh jeńip alsa, О́zbekstannyń ókili Ekaterına Týngýskova qola medaldy ıelendi.
Erlerdiń jarysynda Vıtalıı Shafar shashasyna shaq juqtyrmady. Ýkraınalyq marafonshy 42 shaqyrym 195 metrlik qashyqtyqty 2 saǵat 19 mınýt 38 sekýndta júgirip ótti. Ekinshi, úshinshi oryn kórshiles memleketterden kelgen sportshylarǵa buıyrdy. Júldelerdiń ıegerleri – qyrǵyzstandyq Ilıa Tıapkın men ózbekstandyq Andreı Petrov.
Jartylaı marafonda (21 shaqyrym 97,5 metr) erler arasynda Nursultan Keneshbekov (Qyrǵyzstan) qarsylas shydatpasa, áıelderdiń básekesinde Aınusqa Kalıdiń (Qyrǵyzstan) baǵy jandy. 10 shaqyrymdyq saıysta Nodırbek Mýtalıpov (О́zbekstan) pen Janna Mamajanova (Qazaqstan) jeńimpaz atandy.