Jarys kúndeligi

Germanııanyń Hıntersarten qalasynda shańǵymen tuǵyrdan sekirýden FIS týrnıri aıaqtaldy. Jarysta Danııl Vasılev kúmis medaldy moınyna ildi. Otandasymyz tek aýstrııalyq Iýlıan Shmıdten qalyp qoıdy. Qola medaldy slovenııalyq Rok Oblak enshiledi. Majarstannyń Sombatheı qalasyn­da uıymdastyrylǵan «Challenge Cup» týrnıriniń sońǵy kezeńinde elimizdiń sporttyq gımnasshy­lary jaqsy óner kór­setti. Erkin jat­ty­ǵýda Dmıtrıı Po­ta­nın jeńimpaz atandy. Sheshýshi tusta ol basty qarsylastary Kevın Penev (Bolgarııa) pen Artem Dolgopıatty (Izraıl) basyp ozdy. «Kerme» jattyǵýyn­da Mılad Karımı top jar­dy. Sheshýshi tu­s­ta ol Ońtústik Amerı­kadan kelgen qos oǵylan – Anhel Barahas (Ko­lým­bııa) pen Lýchano Letelerdi (Chılı) artqa tastady. Qytaıdyń Sındao qalasynda ótken Gran-prı týrnırinde otandyq dzıýdoshylarymyz sátsiz óner kórsetti. Jarys jolyna shyqqan segiz sportshynyń arasynan eń táýir nátıjege Ádilet Almat qol jetkizdi. Qola medal úshin tartysta ol túrkııalyq Vedat Albaraqtan utylyp, besinshi oryndy qanaǵat tutty. Qurlyqtyq hokkeı lıgasynda (QHL) qatarynan tórt kezdesýde utylǵan «Barystyń» bul joly baǵy jandy. Báseke barysynda Novosibirdiń «Sıbır» klýbynan eki ret eki shaıba aıyrmashylyǵymen utylyp jatqan jerlesterimiz aqyrynda jeńisti qarsylastardyń ýysynan julyp áketti. Esep – 6:4. Astanalyqtardyń sapynda Semen Sımonov (eki ret), Dmıtrıı Breýs, Djeık Massı , Ien Makkoshen, Meıson Morellı mergendik tanytty. Fýtboldan elimiz chempıonatynyń birinshi lıgasynda Aqtaýdyń «Kaspıı» klýby top jardy. Olar 59 upaı jıdy. Osy nátıjesiniń arqasynda Mańǵystaý oblysynyń komandasy Premer-lıgaǵa joldama aldy. Qytaıdyń bas shahary Beıjińde WTA men ATR 1000 týrnırleri jalǵasyp jatyr. Álemniń eń úzdik tennısshileri bas qosqan jarystyń alǵashqy aınalymynda bos bolǵan Elena Rybakına kelesi kezeńde amerıkalyq Ketı Maknellıdi 7:5, 4:6, 6:3 esebimen eńserdi. Odan keıin elimizdiń birinshi raketkasy germanııalyq Eva Lıspen sheberlik baıqasty. Bul oıynda Elena qarsylasyna jol berdi – 3:6, 6:1, 4:6. Iýlııa Pýtınseva men Aleksandr Býblık tusaýkeser kezdesýlerinde jeńilistiń kermek dámin tatty. Serbııalyq Aleksandra Krýnıchpen juptasyp oınaǵan Anna Danılına birinshi kezeńde Magdoı Lınnet (Polsha) pen Klara Taýsonnan (Norvegııa) basym tústi – 6:4, 6:2. Fýtboldan elimizdiń Premer-lıgasynyń 24 týr oıyndary óte nátıjeli boldy. «Jeńis» óz alańynda «Turandy» 6:3 esebimen utty. Bul matchta Dinmuhamed Qaraman, Vsevolod Sodovskıı, Zýrab Tevdazde eki goldan soqty. «Atyraý» Jezqazǵanda jergilikti «Ulytaýdyń» 5:1 esebimen tas-talqanyn shyǵardy. Qonaqtardyń oıynshysy Konstantın Dorofeev dýbl avtory atandy. «Aqtóbe» men «Qyzyljar» arasyndaǵy básekeniń taǵdyryn 8-mınýtta Danıel Sosa soqqan jalǵyz ǵana dop sheshti – 1:0. Kókshetaýda «Oqjetpes» «Astanadan» jeńildi – 1:2. Elordalyq klýbtyń enshisindegi eki dopty da Nazmı Grıpshı saldy. Semeıde «Elimaı» «Ordabasydan» basym tústi – 2:1. «Tobyl» men «Qaısar» arasyndaǵy match 1:0 esebimen qostanaılyqtardyń paıdasyna sheshildi.