Keıingi 3 jylda Túrkistan oblysy ákiminiń orynbasary qyzmetin atqarǵan Beısenbaı Tájibaev Prezıdent ákimshiliginiń memlekettik ınspektory bolyp taǵaıyndaldy, dep jazady Egemen.kz.
Bul týraly Beısenbaı Tájibaevtyń ózi áleýmettik jelidegi paraqshasynda habarlady.
Ol Túrkistan óńirinde qoǵamdyq-áleýmettik salalarǵa jetekshilik jasaǵan. Beısenbaı Tájibaev Túrkistan oblysy ákiminiń orynbasary bolǵan tusta eńserilgen aýqymdy sharalardy qorytyndylady.
«Bilim salasy boıynsha únemdelgen qarajat esebinen byltyr 200 mektep jóndeýden ótip, 128 mekteptiń jylý qazandyǵy gazǵa aýystyryldy. Bıyl 100 mektepke jóndeý júrgizildi. Eki jyldyń ishinde 400-den astam bilim uıasyna qarajat bóldirtip, rettedik. «Keleshek mektepteri» ulttyq jobasy aıasyndaǵy 29 jańa mektep bilim ınfra qurylymyna úlken serpilis ákeldi. Qazir oblysta úsh aýysymdy 1, apatty 1 mektep ǵana qaldy. Ekeýiniń de qurylysy qolǵa alyndy, keler jyly bul máselege núkte qoıylady.
Balabaqsha máselesin vaýcher arqyly túbegeıli ońtaıly sheshýge qol jetkizdik. Ár jyl saıyn 8 myńdaı bos oryndy anyqtap, qysqartyp, kezekte turǵan balalardyń ornalasýyna jol ashtyq. Respýblıka kóleminde balabaqshamen qamtý 99,6%-ǵa jetip, joǵary eń joǵarǵy kórsetkishti ıelendik. Áleýmettik salada «Samǵaý» jáne «Shuǵyla» ońaltý ortalyqtary ashyldy. Taıaýda jańa «Ardagerler úıi» men «Qamqorlyq» ortalyǵy paıdalanýǵa beriledi. Byltyr shalǵaı aýyldarda 55 medısınalyq nysan salyndy. Bıyl taǵy 32-i boı kóterýde. 10-nan astam aýrahanaǵa kúrdeli jóndeý júrgizildi», dep jazdy Beısenbaı Tájibaev.
Sondaı-aq Beısenbaı Dáýletuly óz jazbasynda «Túrkistan qalasynyń erekshe mártebesi týraly» Zańnyń jumys tobynda 1,5 jyl eńbek etkenine nazar aýdardy.
Jańadan taǵaıyndalǵan Prezıdent ákimshiliginiń memlekettik ınspektory eńbek jolyn «Shymkent kelbeti», «Panorama Shymkenta» gazetterinde bastap, ár jyldary Shymkent qalasy baspasóz qyzmetiniń basshysy, Túrkistan oblystyq ishki saıasat basqarmasynyń basshysy, 2019-2022 jyldary «Nur Otan» partııasy Túrkistan oblystyq fılıaly tóraǵasynyń birinshi orynbasary, 2022 jyldyń naýryz aıynan bastap osy kúnge deıin «AMANAT» partııasy Túrkistan oblystyq fılıalynyń atqarýshy hatshysy laýazymyn atqaryp keldi. Sondaı-aq 2020 jyldan Túrkistan oblystyq máslıhatynyń VII shaqyrylymdaǵy depýtaty boldy. Joǵaryda atap ótkenimizdeı keıingi úsh jylda Túrkistan oblysy ákiminiń orynbasary qyzmetin atqardy.