Jetisý oblysynyń Qaratal aýdanynda bıylǵy kúrish jınaý naýqany qyzý júrip jatyr. Bul óńir – oblystaǵy kúrish ósiretin jalǵyz aımaq. Jalpy 951 gektar alqapqa egilgen daqyldan 3 myń tonnadan astam ónim alý josparlanyp otyr. Ortasha túsim – gektaryna 32,9 sentner, dep habarlaıdy Egemen.kz.
Kúrish ósirýmen aýdanda bes sharýashylyq aınalysady. Sonyń ishinde «Opytnoe» óndiristik kooperatıvi negizgi ónim berýshilerdiń biri sanalady. Kooperatıv tóraǵasy Erjan Qaısanovtyń aıtýynsha, bıyl 350 gektarǵa «Iаntar» surpy egilgen. Bul tuqym jergilikti tabıǵatqa beıimdiligimen ári tózimdiligimen erekshelenedi. Qazirdiń ózinde 70 gektardan ónim jınalyp, naýqan oıdaǵydaı júrip jatyr.
Jumysqa 20 adam men 15 tehnıka tartylǵan. Memleket tarapynan jeńildetilgen janar-jaǵarmaı, tuqym men tyńaıtqyshqa sýbsıdııa berilse, tehnıka lızıng arqyly alynǵan. Buǵan qosa, aýdanda arnaıy servıstik-daıyndaý ortalyǵy qurylyp, onda 10-nan astam aýyl sharýashylyǵy tehnıkasy sharýalardyń ıgiligine berilgen.
Kúrish jınaýdyń ereksheligi jóninde mehanızatorlar da óz oıymen bólisti. Olardyń aıtýynsha, bastysy – ýaqytty dóp basý: dán tolyq pisken, biraq qýrap qalmaǵan kezin ańdaý. Ol úshin alqap aldyn ala qurǵatylyp, sýy tartylyp alynady.
Aıta keteıik, bıyl Jetisý oblysynda jalpy egis kólemi 510,7 myń gektarǵa jetip, aýyl sharýashylyǵyn qoldaýǵa 41,7 mlrd teńge qarastyryldy. Onyń ishinde 24,1 mlrd teńgesi sýbsıdııa túrinde bólingen.