Eldiń damýy men qoǵamnyń turaqtylyǵy eń aldymen zań ústemdigi ári tártipke baǵyný mádenıetine tikeleı baılanysty. О́ıtkeni zań bar jerde quqyq qorǵalady, tártip bar qoǵamda teńdik ornaıdy. Memlekettiń irgesi berik bolýy úshin zańnyń bedeli bıik turýǵa tıis, al azamattar óz kezeginde sol zańdy qurmettep, tártipti saqtaýy qajet. Sondyqtan da Prezıdentimiz bıylǵy Joldaýynda «Zań men tártip» qaǵıdatyn memleketimizdiń myzǵymas tuǵyry dep aıryqsha atady.
Qasym-Jomart Toqaev qoǵamda osy qaǵıdatty túbegeıli ornyqtyrý úshin barlyq quzyrly organ arasynda ortaq kózqaras pen ustanym bolýǵa tıis ekenin shegelep aıtty. «Bul – eń aldymen, eshqandaı quqyq buzýshylyqqa jol bermeý qaǵıdasy, ıaǵnı kez kelgen zańsyzdyqqa qarsy turý degen ustanym. Sondyqtan memlekettik organdardyń osy baǵyttaǵy jumysyn barynsha qoldaý qajet. Sonda ǵana elimizde quqyq buzýshylyqqa, ozbyrlyq pen zorlyq-zombylyqqa qarsy sana-sezim qalyptasady, qoǵamǵa jat kez kelgen áreketke tózbeýshilik paıda bolady» dedi ol Joldaýda.
«Zań jáne tártip» qaǵıdatyn búgingi Ádilet organdarynyń qyzmetkerleri kúninde qozǵap otyrǵanymyz beker emes. О́ıtkeni elimizde zań ústemdigi men tártip bultartpastyǵyn júzege asyrý tizgini berilgen salanyń biri osy. Naqtyraq aıtqanda, ádilet organdaryna júktelgen eń basty mindet – zań shyǵarý úderisine bastamashy bolý, azamattar men uıymdardyń quqyqtary men bostandyqtaryn qorǵaý, sondaı-aq memlekettik quqyqtyq saıasatty qalyptastyrý.
Ádilet mınıstri Erlan Sársembaevtyń aıtýynsha, elimizdegi barlyq bastama men reformalar eń aldymen qoǵam ıgiligi úshin jasalady. Bul jumystardy jedeldetý ári halyqqa túsinikti de qoljetimdi etý úshin búgingi tańda qyzmetterdi sıfrlandyrý men onlaın formatqa kóshirý, sonymen qatar jasandy ıntellekt múmkindikterin paıdalaný isi qarqyndy qolǵa alynǵan. Ol ádilet organdary aldynda turǵan aýqymdy jumystardyń qatarynda zań shyǵarý úderisin zamanaýı quraldardy qoldana otyryp sıfrlandyrý, kórsetiletin qyzmetterdiń ashyqtyǵy men qoljetimdiligin qamtamasyz etý úshin olardy sıfrlyq formatqa kóshirý jáne sot aktileriniń oryndalýyn jaqsartý turǵynan ekenin aıtyp ótti.
«Zań shyǵarý úderisin zamanaýı quraldar arqyly sıfrlandyrý zańdardy sapaly ázirleýge, normalar ishindegi qaıshylyqtardy boldyrmaýǵa, sondaı-aq azamattardyń quqyǵyn ádil qorǵaýǵa jol ashpaq. Osyǵan oraı jasandy ıntellektiniń kómegimen «Ádilet» quqyqtyq keńesshisi ázirlendi. Ol azamattarǵa qoljetimdi quqyqtyq kómek berýge arnalǵan. Artyqshylyǵy – quqyqtyq suraqtarǵa jaýap bergende derekterdi ashyq ınternet kózderinen emes, naqty qoldanystaǵy zańnamadan, resmı normatıvtik-quqyqtyq aktilerden alady. Sonymen qatar aldaǵy ýaqytta JI kómegimen normatıvtik-quqyqtyq aktilerdi taldap, ózara qaıshylyqtary bar normalardy izdeý, zań tehnıkasyna sáıkestigin tekserý, boljaý jáne basqa da fýnksıonaldy engizý josparda tur», deıdi mınıstr.
Onyń aıtýynsha, ádilet organdary usynatyn qyzmetter arasynda «E-notariat» arqyly jyljymaıtyn múlikti rásimdeýge, «Zan-komegi» platformasynda quqyqtyq keńes alýǵa bolady. Salada atqarylyp jatqan jumystar saıyp kelgende qoǵamda zań ústemdigin ornatý men bıýrokratııa kedergilerin joıý arqyly halyqtyń bılik organdaryna degen senimin qalyptastyrady. Mınıstr E.Sársembaev ádilet degenimiz jaı ǵana júıe emes, azamattardyń taǵdyryna tikeleı áseri bar tirek, al árbir sheshim shyn mánindegi ádil memleket qalyptastyrýǵa baǵyttalǵan qadam ekenin aıtady. «Halyq únine qulaq asatyn memleket» tujyrymdamasynyń da máni osy bolsa kerek.