Qyrkúıektiń sońǵy kúnderi Batys Qazaqstan oblysynyń Aqjaıyq aýdanynda Qazaqstannyń halyq jazýshysy, KSRO jáne Qazaqstan Memlekettik syılyqtarynyń laýreaty Juban Moldaǵalıevtiń 105 jyldyǵy atalyp ótti.
Mereke aıasynda ótken keshendi is-sharalardyń eń bastysy – «Tarıh. Taǵdyr. Tulǵa. Juban Moldaǵalıev murasy» atty respýblıkalyq-aımaqtyq ǵylymı-tanymdyq konferensııa boldy. Jıynǵa Batys Qazaqstan oblysy ákimi apparatynyń basshysy Nurdildá Oraz, Qazaqstannyń eńbek sińirgen qaıratkeri, aqyn Aqushtap Baqtygereeva, jazýshy, kompozıtor Ilııa Jaqanov, Juban aqynnyń urpaqtary men zııaly qaýym ókilderi qatysty.
Konferensııa minberinde sóz alǵan aqyn Aqushtap Baqtygereeva Juban Moldaǵalıev shyǵarmashylyǵyna sholý jasap, aqynnyń azamattyq tulǵasy jaıynda estelik aıtty. Sondaı-aq Qazaqstannyń Eńbek Eri Ilııa Jaqanov, aqyn, ustaz, jubantanýshy Úzildik Eleýbaeva, respýblıkalyq «Úshqońyr» gazetiniń bas redaktory Bolat Batyruly, Mahambet atyndaǵy Batys Qazaqstan ýnıversıtetiniń qaýymdastyrylǵan professory, fılologııa ǵylymdarynyń kandıdaty Gúlshara Bısenova jáne basqalary da túrli taqyrypta mazmundy baıandama jasady.
Osy mereıtoı aıasynda oqyrman qaýymǵa «Juban Moldaǵalıev. Estelikter. Tarıhı-ǵumyrderektik anyqtamalyq» atty kitap tanystyryldy.
Bul kúni aýdandyq mádenı-demalys ortalyǵy usynǵan «Men myń da bir tirildim máńgi ólmeske» kórme-qoıylymy erekshe áserli shyqty.
Juban toıy «Dáýir daýylpazy – Jyr-Juban» atty oblystyq aqyndar aıtysymen jalǵasty. 12 aqyn juptasyp óner kórsetken sóz saıysyn Ǵarıfolla Qurmanǵalıev atyndaǵy fılarmonııa dırektory Baýyrjan Halıolla qorytyndylap, aýdan ákimi Murat Serdalın aqyndarǵa aqshalaı sertıfıkat tabystady.
Juban aqynnyń mereıli toıy dúbirli dala oıyndaryna jalǵasty.
Batys Qazaqstan oblysy