Memleket basshysy bıylǵy Joldaýynda jasandy ıntellektini ulttyq damýdyń negizgi tetigi retinde aıqyndady. «Men aldymyzǵa óte mańyzdy strategııalyq maqsat qoıdym. Elimiz úsh jyl ishinde mindetti túrde jappaı sıfrlyq el bolýy kerek. Biz jappaı sıfrlandyrý jáne jasandy ıntellekt tehnologııasyn barynsha engizý arqyly ekonomıkany jańǵyrtýymyz qajet», dedi Prezıdent. Sondaı-aq ol JI-di barlyq salaǵa engizýdi mindettep, startap jobalarǵa basymdyq berip, oǵan erekshe qoldaý kórsetý qajettigin atap ótti. Qazirde jasandy ıntellekt negizinde jasalǵan túrli startap jobalar ár salada ázirlenip jatyr. Solardyń birqataryn oqyrman nazaryna usynamyz.
Búginde ekonomıka, bıznes, memlekettik qyzmet, bilim, ǵylym, densaýlyq saqtaý salalaryn sıfrlandyrý qarqyndy júrip jatyr. Máselen, Ǵylym jáne joǵary bilim mınıstrliginiń málimetinshe, 30 joǵary oqý ornynda jasandy ıntellektige qatysty 38 jańa baǵdarlama iske qosylǵan. Onyń ishinde qoldanbaly JI, medısınadaǵy JI, blokcheın ınjenerııasy sııaqty salalar bar.
Al Densaýlyq saqtaý mınıstrligi jasandy ıntellektige negizdelgen 40-qa jýyq startap jobany qabyldaǵan. Sonyń ishinde 15 joba dıagnostıkaǵa baǵyttalǵan eken. Beseýi qanatqaqty rejimde synaqtan ótse, ekeýi klınıkalyq praktıkaǵa engizilgen. Prezıdent tapsyrmasyna sáıkes, áleýmettik mańyzy joǵary alty jobaǵa erekshe qoldaý kórsetilip jatyr. Solardyń biri JI-Terapevt – daýys pármeni arqyly medısına-lyq qujattardy avtomatty túrde daıyndaıtyn jasandy ıntellekt júıesi. Ol naýqastyń emdelý tarıhyn jazyp, aldyn ala dıagnozdar qoıady jáne klınıkalyq usynystardy qamtıtyn medısınalyq esepti avtomatty túrde shyǵarady.
Mádenıet jáne aqparat mınıstrligi de osy baǵytta naqty sharalardy qolǵa alyp otyr. Máselen, jalǵan kontent pen dıpfeıkterdi avtomatty túrde anyqtaıtyn sıfrlyq bastama iske qosyldy. Sondaı-aq aqparattyq keńistikti táýlik boıy qadaǵalaıtyn «Mergen» júıesi zańǵa qaıshy ınternet-dúkenderdi anyqtap, buǵattap otyr.
Eńbek jáne halyqty áleýmettik qorǵaý mınıstrligi «Skills.enbek» platformasyn JI negizinde tolyq jetildirgen. Buryn kýrstardy izdeý men jarııalaý qıyndyq týdyrsa, qazir jasandy ıntellekt rezıýme men bos oryndardy taldap, qoldanýshyǵa sáıkes kýrstardy ózi usynady. Sonymen qatar avtorlarǵa baǵdarlamalaryn tirkeýge kómektesedi. Búginge deıin platformanyń chat-boty men servısterin azamattar alty júz elý myńnan astam ret paıdalanyp úlgergen.
Budan bólek, «SmartCity Astana» jobasy qaladaǵy ómir sapasyn arttyrýǵa baǵyttalǵan. Joba aıasynda jasandy ıntellekt qoldanylatyn astananyń sıfrlyq kóshirmesi jasalady. Oǵan 100 myńnan astam beınebaqylaý kameralary qosylyp, qoǵamdyq oryndardaǵy qaýipterdi onlaın-rejimde anyqtap, jedel áreket etýge múmkindik beredi.
«AlemLLM» – qazaq tilinde jasalǵan iri tildik model. Ol joǵary dáldikke ıe jáne jergilikti jaǵdaıda qoldanýǵa beıimdelgen. Model qazir qoldanystaǵy uqsas sheshimderdiń ishindegi eń tıimdisi sanalady ári túrli salada keńinen paıdalanýǵa baǵyttalǵan.
«AI Kitap» – jasandy ıntellekt negizindegi sıfrlyq oqýlyqtar platformasy. Júıe árbir oqýshynyń bilim deńgeıin, úlgerimin jáne jeke erekshelikterin eskere otyryp, oqý barysyn jekelegen sıpatta júrgizýge múmkindik beredi.
«Baspana Hub» – turǵyn úıge qatysty barlyq qajettilikti onlaın formatta sheshýge arnalǵan sıfrlyq ekojúıe. Júıe arqyly azamattar jyljymaıtyn múlikti marketpleıs arqyly izdep, satyp ala alady, memlekettik qyzmetterdi rásimdeıdi, jóndeý jumystaryna tapsyrys berip, qurylys materıaldaryn onlaın-smeta arqyly alýǵa bolady. Joba syrtqy qarjy men ınvestısııa tartpaı-aq iske asqan.
«Biny.co» – júk tasymaly salasyndaǵy otandyq startap. Joba «Google for Startups» – «Silkway Accelerator» baǵdarlamasyna qatysyp, úzdik úshtikke kirgen. Startaptyń klıentteri qatarynda «QazPost», «Coca-Cola», «Gorilla Asia», «Zeta Trade» sııaqty iri kompanııalar bar.
«Surfaice.pro» – otandyq kásipkerler Kremnıı alqabynda qurǵan tehnologııalyq kompanııa. Joba qurylys salasyna arnalǵan ınnovasııalyq sheshim ázirleýde jáne AQSh-tyń bes shtatynda jumys istep jatyr. Startap «Big Sky Capital» jáne «Shadow Ventures» qorlarynan 1,5 mıllıon dollar ınvestısııa tartqan.
«OlympIQ» – sport salasyn damytýǵa baǵyttalǵan tehnologııalyq platforma. Ol sporttaǵy analıtıkalyq, medısınalyq, uıymdastyrýshylyq jáne operasııalyq derekterdi jasandy ıntellekt arqyly óńdeýge múmkindik beredi.
Erte kezeńde orman órtin anyqtaý júıesi – beınemonıtorıng, beıneanalıtıka jáne jasandy ıntellektige negizdelgen joba. Bul júıe órt oshaǵyna den qoıý ýaqytyn qysqartyp, apattyń kólemi men zardabyn edáýir azaıtady. Joba qazirdiń ózinde «Býrabaı» memlekettik ulttyq tabıǵı parkinde jáne «Ertis ormany» memlekettik orman rezervaty aýmaǵynda iske asyrylyp jatyr.
JI-hattamashy – memlekettik organdardaǵy jınalys aýdıojazbalaryn mátinge túsirip, resmı hattamalardy avtomatty túrde ázirleıtin jasandy ıntellekt júıesi. Bul qujat aınalymyn jedeldetýge, qol eńbegin azaıtýǵa jáne aqparattyń dáldigi men saqtalýyn qamtamasyz etýge baǵyttalǵan.
Radıologııalyq zertteýlerdi ortalyqtandyrýǵa arnalǵan jobalar – jasandy ıntellektini qoldana otyryp, onkologııalyq aýrýlardy erte kezeńde anyqtaýǵa múmkindik beredi. Bul júıe medısınalyq keskinderdi saqtap, óńdeýge arnalǵan.