Jambyl oblysyndaǵy eginshilik pen mal sharýashylyǵy salasy birqatar júıeli kedergilerge tap bolyp otyr. Bul týraly búgin Májilistiń jalpy otyrysynda depýtat E. Saýryqov aıtty, dep jazady Egemen.kz.
«2023 jyly qýańshylyq jarııalanyp, tótenshe jaǵdaı engizilgenimen, ótemaqy tek sýarmaly jerleri bar sharýashylyqtarǵa ǵana berildi.
Al tálimi jermen aınalysatyn fermerler eshqandaı kómek ala almady.
Bul – sharýalarǵa tıgen alǵashqy soqqy edi. 2024 jyly ónim mol jınalǵanymen, Reseıden arzan astyqtyń aǵylyp kelýi saldarynan baǵa kúrt quldyrady.
Otandyq dıhandar óz ónimin ótkize almady. Shyǵyn jabylmady, tabys túspedi. Buǵan qosa, sýbsıdııa tólemderi keshiktirilip, sharýalardyń jaǵdaıy odan ári aýyrlady.
2025 jyly qaıtadan qýańshylyq qaıtalandy. Túrkistan oblysynda tabıǵı sıpattaǵy tótenshe jaǵdaı jarııalanǵanymen, Jambyl oblysynda mundaı qadam jasalmady. Sonyń saldarynan sýbsıdııa da, ınvestısııalyq qoldaý da berilmedi. Myńdaǵan sharýashylyq qazir bankrot bolýdyń aldynda tur» , dedi depýtat.
E. Saýryqov osyndaı kúrdeli jaǵdaıǵa qaramastan Agrarlyq nesıe korporasııasy tolyq tóleýdi talap etip otyr.
«Bul – ádiletsiz jaǵdaı dep esepteımiz!
QazAgroQarjy deregine súıensek, aǵymdaǵy jyldyń shilde aıynyń ózinde Jambyl oblysynda 62 jobanyń problemalyq bolyp tirkelgeni anyqtaldy. Qazir kúzde bul kórsetkish eki esege artýy múmkin. Demek, júzdegen sharýashylyqtyń tehnıkasy tárkilenip, jappaı bankrottyqqa jol beriledi.
Bul tek sharýalardyń emes, búkil aýyl halqynyń, myńdaǵan adamnyń taǵdyry», dedi E. Saýryqov.
Májilismen osyǵan qatysty 2024–2025 jyldarǵa arnalǵan sýbsıdııalar men ınvestısııalyq sýbsıdııalar boıynsha bereshekterdi tolyq óteýdi qamtamasyz etip, tólem kestesin naqty bekitip, elimizdiń ońtústik óńirlerine arnalǵan jeke memlekettik baǵdarlama ázirleýdi usyndy. Sondaı-aq kúzgi dala jumystaryna, tuqym men janar-jaǵarmaıǵa arnalǵan óńirlik turaqtandyrý qory jasaqtaý qajet ekenin atap ótti.