Astanadaǵy Roza Baǵlanova atyndaǵy Qazaqkonsert zalynda qazaqtyń uly kúıshi-kompozıtory Táttimbettiń 210 jyldyǵyna arnalǵan erekshe kesh ótedi. Shertpe kúıdiń sheberi, Mádenıet salasynyń úzdigi Qaırat Aıtbaev kórermenderge «Saryjaılaý» atty mýzykalyq-poetıkalyq konsertin usynady, dep jazady Egemen.kz.
Arqa kúıshilik mektebiniń búgingi ókili Qaırat Aıtbaev babalar sazyn oryndap qana qoımaı, tyńdarmanǵa jańa formatta jetkizip júrgen sınkretti ónerpaz. Ol kúı tarıhy, kúıshiniń shyǵarmashylyq zerthanasy haqynda birqatar eńbek jazyp, ónertaný ǵylymyna eresen úles qosqan zertteýshi. Táttimbet mereıtoıyna arnalǵan kesh te kórermendi jańasha tańǵaldyrary anyq.
Kesh júrgizýshisi – aqyn Umtyl Zaryqqan.
Arnaıy qonaqtar qatarynda Qazaqstannyń eńbek sińirgen qaıratkeri, dáýlesker kúıshi, mýzykatanýshy ǵalym Janǵalı Júzbaı, memleket jáne qoǵam qaıratkeri, professor Dúısen Qaseıinov bar.
Baǵdarlamada jas aqyndardyń poezııasy, dástúrli án men kúı óneriniń ozyq úlgileri usynylady. Keshke aqyndar Tileýbek Batysuly men Tólegen Mıllat, dástúrli ánshi Serjan Musaıyn, ánshi Kúnsulý Túrikpen, kúıshiler Murat Sultanbaı, Aıtolqyn Toqtaǵan, Venera Tabys, Aıdos Sanııazbekuly, Jaqanov Nurmuhanmet jáne jas talant Álıhan Moldabekuly qatysady.
Kúı men jyr qatar óriletin kesh 16 qazany kúni, saǵat 19:00-de ótedi.