Prezıdent mádenı-gýmanıtarlyq baılanystardy qazaq-majar qatynasynyń altyn arqaýy dep atady, dep habarlaıdy Aqorda.
– Osy baǵyttaǵy yntymaqtastyqty nyǵaıtý aıryqsha mańyzdy. Sondyqtan mádenıet, bilim-ǵylym salasynda birlesken jobalardy júzege asyrýǵa erekshe nazar aýdardyq. Qazirgi tańda majar eliniń úzdik joǵary oqý oryndarynda Qazaqstannyń myńnan astam stýdenti bilim alyp jatyr. Sol úshin Majarstan Úkimetine zor alǵys aıtamyn. Biz osy eldegi joǵary oqý oryndarymen yqpaldastyǵymyzdy odan ári damytýǵa daıynbyz, – dedi Qasym-Jomart Toqaev.
Memleket basshysy Prezıdent Tamash Shýıokpen aımaqtyq jáne jahandyq mańyzy bar ózekti máseleler boıynsha pikir almasqanyn aıtyp, álemdegi geosaıası ahýaldyń ýshyǵýy, túrli qaqtyǵystardyń kóbeıýi eki eldi de alańdatatynyna toqtaldy.
Taraptar barlyq túıtkildi Birikken Ulttar Uıymy Jarǵysyna sáıkes beıbit jáne saıası-dıplomatııalyq jolmen sheshý qajet dep sanaıdy.
Osy rette prezıdentter halyqaralyq deńgeıde bir-birine qoldaý bildirip, birlese jumys isteýge kelisti.
– Búgingi kelissózder jemisti boldy. Qazaqstan men Majarstan arasyndaǵy baılanys qarqyndy damyp kele jatyr. О́zara tıimdi yqpaldastyǵymyz jańa ári sapaly deńgeıge kóteriledi dep senemin. Qol jetkizgen barlyq kelisimder oıdaǵydaı oryndalatynyna kúmánim joq. Baýyrlas halyqtarymyzdyń yntymaǵy berik bolsyn. Elderimiz ósip-órkendeı bersin! – dedi Qazaqstan Prezıdenti.
Majarstan Prezıdenti elder arasynda tyǵyz saıası baılanys ornaǵanyn, saýda-ekonomıkalyq yntymaqtastyq dáıekti túrde damyp kele jatqanyn jáne sıfrlandyrý salasyndaǵy yqpaldastyq perspektıvasyn atap ótti.
– Biz Qazaqstandaǵy sıfrlandyrý úderisin jiti qadaǵalap otyrmyz. О́ıtkeni sizdiń el bul máselede aımaqta ǵana emes, álem boıynsha aldyńǵy qatarda keledi. Biz Qazaqstandy atalǵan mańyzdy baǵyttaǵy bedeldi seriktes sanaımyz jáne yntymaqtastyǵymyzdy damytýǵa úmittimiz. Majar-qazaq baılanystarynyń áleýeti zor. Prezıdent retinde muny iske asyrýǵa tolyq qoldaý kórsetemin, – dedi Tamash Shýıok.