Memleket basshysy Qasym-Jomart Toqaev oqý-aǵartý isinde eleýli úles qosqan muǵalimderdi kásibı merekesimen quttyqtap, memlekettik nagradalarmen marapattady. Sonyń ishinde Jezqazǵan qalasyndaǵy № 8 gımnazııa muǵalimi Kúlzıra Qydyrpatshaeva da bar, dep jazady Egemen.kz.
Qazaqta «bir árip úıretkenge qyryq jyl sálem ber» deıdi. Al úzilissiz qyryq jyl sabaq bergen ulaǵatty ustaz máńgilik qurmettelýi tıis. Mine, pedagogıka salasynda 41 jyl qyzmet etken Kúlzıra Orzanbaıqyzy Memleket basshysynyń qolynan «Eren eńbegi úshin» medalimen marapattaldy.
Kásibı baǵyty – bıologııa. Keıingi 15 jyl bederinde dırektordyń ǵylymı ádistemelik jumys jónindegi orynbasary qyzmetin atqaryp keledi.
«Ustaz bolý – mamandyq qana emes, ol – ómirlik ustanym. Zamanaýı ustaz únemi izdeniste júredi, jańalyqqa ashyq, ár balanyń júregine jol taba biledi. Búgingi muǵalim – tek bilim berýshi emes, shákirtiniń dosy, baǵyt berýshisi», deıdi bilikti ustaz.
Tájirıbesi mol mamannan jas muǵalimderge beretin keńesin suradyq.
«Eń bastysy – balaǵa degen mahabbat pen sabyr. Qatelik jasasańyz – ol sizdiń tájirıbeńiz, qoryqpańyz. Únemi izdenip, ár oqýshyny tyńdap, syılaı bilińiz. Sonda ǵana ustazdyq jolyńyz berekeli bolady dep keńes berer edim», deıdi K. Qydyrpatshaeva.
Sonymen qatar ustazdyń eń úlken marapaty – shákirtiniń jetistigi ekenin jetkizdi. «О́z oqýshysynyń tabysyn kórgende ustaz eńbegi aqtalady. Bul – kez kelgen marapattan qymbat».
Iá, búgingi partadaǵa oqýshy – erteńgi atpal azamat. Sózimizge Prezıdent sózi tııanaq bolsyn. Mártebeli mamandyq ıelerin quttyqtaǵan Qasym-Jomart Toqaev elimizde 2019 jyldan beri qylmystyq quqyqbuzyshylyqtyń sany eki ese qysqarǵanyn aıtty. «Qoǵamda joǵary quqyqtyq mádenıet qalyptastyrýda oqý-aǵartý mınıstrligi men pedagogter aıryqsha ról atqarady. Sebebi ádildik, zań jáne tártip qaǵıdattary mektep partasynan bastap ornyǵýy qajet», dedi Memleket basshysy.