Atyraý oblysynyń ákimi Serik Shápkenovtiń aıtýynsha, keıingi jyldary turǵyndardyń ómir sapasyn jaqsartýǵa, áleýmettik nysandar men ınfraqurylymdy damytýǵa jańa jumys oryndaryn ashýǵa baǵyttalǵan aýqymdy jumys qolǵa alyndy. Aldaǵy ýaqytta osyndaı bastamalar júıeli jalǵasyp, óńirdiń ekonomıkalyq áleýetin arttyrý, jastarǵa jańa múmkindikter usyný, aýyldardy órkendetý máselesi basty nazarda bolady.
Qazir munaıly óńir ınvestısııa tartý boıynsha jetekshi oblystardyń qatarynda tur. Bıyl oblys delegasııasy Reseı, Qytaı, Pákistan, Germanııa, AQSh, Ulybrıtanııa, Izraıl, Qatar, Ispanııa, Italııa, Aýstralııa, Lıtva, О́zbekstan elderiniń basshylarymen, iri bıznes ókilderimen kelissózder júrgizdi. Nátıjesinde, 20-dan astam yntymaqtastyq ornatý jónindegi qujattarǵa qol qoıyldy. Onyń ishinde ındýstrııalyq park qurý, jel jáne gaz elektr stansalaryn salý, jasyl energetıka jobalary bar.
«Osy kezge deıin munaı ónimderin shıkizat kúıinde ǵana eksporttaýmen aınalystyq. Ásirese ónim óńdeý, óndirý ónerkásibi shet qaldy. Qazir óńirde 599 kásiporyn jumys isteıdi. Onyń 4-eýi – iri, 13-i – orta, 582-si shaǵyn kásiporyndar. О́ńir ekonomıkasyn ártaraptandyrý aıasynda iri jobalar qolǵa alynyp otyr. Byltyr jylyna 6 myń júk vagonyn shyǵarý jobasy iske qosyldy. О́ńirde jalpy quny 44 mlrd teńge quraıtyn 11 jobany júzege asyrý qolǵa alyndy. Onyń 2-eýi jumysyn bastady. Buǵan qosa, quny 6,5 trln teńgege baǵalanǵan 5 iri munaı-gaz hımııa jobasy júzege asyrylyp jatyr. Bul jobalar qurylys kezinde 18 myń jumys ornyn, iske qosylǵanda 3 myń turaqty oryndy qamtamasyz etedi», deıdi S.Shápkenov.
Kómirsýtekti shıkizaty mol óńirde «Ulttyq ındýstrıaldyq munaı-hımııa tehnoparki» arnaıy ekonomıkalyq aımaǵynda 18 qatysýshy tirkelgen. Munda ınvestorlarǵa salyqtyq, kedendik jeńildikter usynylady. Atalǵan aımaqta jylyna 500 myń tonna ónim shyǵaratyn polıpropılen kesheni salyndy. Aldaǵy jyldary polıetılen, býtadıen óndirisin iske qosý josparlanyp otyr.
Ákimniń málimetine súıensek, 2025–2029 jyldary quny shamamen 7 trln teńgeni quraıtyn 46 ınvestısııalyq joba júzege asyrylady. Jobalar óńirge 6 myńǵa jýyq jańa jumys ornyn ashýǵa múmkindik beredi. Salany sıfrlandyrý maqsatynda Atyraý oblysynyń ınvestısııalyq kartasy ázirlendi. Bul geoportal ınvestorlarǵa óńir múmkindigimen tanysýǵa, jańa jobalarǵa qatysýǵa, óz bastamalaryn usynýǵa jaǵdaı jasaıdy.
«Ustanatyn basty maqsatymyzdyń biri – azyq-túlik qaýipsizdigin qamtamasyz etý maqsatynda ıgerilmeı jatqan aýyl sharýashylyǵy jerlerin qaıtarý, tıimdi paıdalaný. 2022–2025 jyldary aralyǵynda jalpy kólemi 564,3 myń gektar jer memleket menshigine qaıtaryldy. Onyń 283,5 myń gektary ǵana qaıta aınalymǵa engizilip, jańa jer paıdalanýshylarǵa tabystaldy. Biraq áli de bul jumysty júıelep, kúsheıtý qajettigi týyndap otyr», deıdi oblys ákimi.
Serik Shápkenovtiń málimetine qaraǵanda, bıyl 2 iri joba iske qosyldy. Birinshisi – «Dossor Processing Company» kompanııasynyń qýattylyǵy jylyna 48 myń tonna quramajem óndiretin zaýyty. Bul óndiriske 602 mln teńge ınvestısııa salynǵan. Al ekinshi jobany «Qýanysh» sharýa qojalyǵy iske asyrdy. Jylyna 300 bas mal bordaqylaý alańynyń quny – 300 mln teńge. Endi 2027 jylǵa deıin 48,3 mlrd teńgege 12 ınvestısııalyq joba iske qosylyp, 458 jańa jumys ornyn ashý josparlanyp otyr.
«Mańyzdy jobalar qatarynda «Goldbridge» kompanııasymen qant zaýytynyń qurylysy bar. «KazGrow Irrigation Systems» kompanııasy 5,6 gektarǵa zaýyt pen ónerkásiptik jylyjaı salady. Bekire balyǵyn óńdeıtin 2 zaýytta jylyna 700 tonna ónim shyǵarylady. «Dáýlet qus» kúnine 250 myń jumyrtqa shyǵaratyn fabrıkany jańǵyrtýǵa 1 mlrd teńge ınvestısııa salǵaly otyr. Qurmanǵazy aýdany men Atyraý qalasyndaǵy kóterme ortalyq bazasynda agrohab jobalary bar», dep málimdedi S.Shápkenov.
Atyraý oblysy