Taý ózeni móp-móldir, tup-tunyq. Tastan-tasqa sekirip, arnasynan tasyp, býyrqanyp jatady. Sharshap shaldyǵýdy bilmeıdi. Taý ózenindeı, muǵalim eńbegi de tynymsyz. Bilim tolqynynda damylsyz, erinbeı eńbek etedi.
Maqalamyzdyń keıipkeri Almaty qalasyndaǵy №90 mamandandyrylǵan mekteptiń dırektory, «Y.Altynsarın» atyndaǵy jáne «Eren eńbegi úshin» medaliniń ıegeri, 1-sanatty basshy, sheber oqytýshy Bulbul Rasbekqyzy balaǵa bilimniń nárin quıyp, nuryn shashatyn, kúsh-jiger berip, ózin de, ózgeni de qanattandyra alatyn ustaz eńbegin «Taý ózeni» ádistemelik quralynda osylaısha dáripteıdi. Bilikti mamannyń óskeleń urpaqqa sanaly tárbıe, sapaly bilim berýdegi 30 jyldan astam tájirıbesi osy eńbekte aıqyn kórinis bergen.
1992 jyly Jambyl pedagogıkalyq ınstıtýtyn bitirip, eńbek jolyn nemis jáne aǵylshyn tilderi oqytýshysynan bastaǵan Bulbul Rasbekqyzy mamandarǵa asa qajettilik týyndaǵan jyldary Abaı atyndaǵy Almaty memlekettik ýnıversıtetin «Qazaq tili men ádebıeti pániniń oqytýshysy» mamandyǵy boıynsha támamdaıdy. Qosymsha bilim berý ortalyǵy, bilim bóliminde istegen jyldarda, sondaı-aq №98 mekteptegi oqytýshylyq qyzmetinde jınaǵan tájirıbesimen shyńdaldy. Keıinnen №120 mektepte dırektordyń oqý jáne tárbıe jónindegi orynbasary bolyp isteı júrip, qazaq tili men ádebıetin oqytýda tyń izdenisterimen kózge tústi. Osy jyldarda kásibı ósýge basty mán bergen bilikti maman «Bilim berýdegi menedjment», «Mektepti tıimdi basqarý», «Bolashaqtyń bolashaǵy mektebi», «Jeke qarjy jáne bıýdjetteý, ınklıýzıvti bilim berý úderisin qalyptastyrý», «Sheksiz mazmun: jańa mektepti jobalaý» baǵytynda bilimin jetildiredi.
Bulbul Rasbekqyzynyń mektep jumysyn damytýdaǵy eńbegi qaladaǵy №15 gımnazııanyń basshylyǵy tusynda joǵary nátıjesin berdi. Gımnazııanyń basqarý tájirıbesi ǵana emes, sapaly bilim berýdegi úlgisi qala mektepterine keń taraldy. Elimizdiń kóptegen túlegi shetel ýnıversıtetteriniń grantyna ıe boldy. Gımnazııany basqarǵan 14 jyldan astam ýaqytta mekteptegi menedjmentti damytyp, bilim oshaǵyn úzdikter qataryna qosty. Bilgenin ózgelerge úıretýden jalyqpaǵan bilikti basshy búgingi kúni de jas mamandarǵa tálimger bolyp, keńesin berýden jalyqqan emes. №15 gımnazııa ujymy byltyr Almaty qalasy ákiminiń 68 mln teńge grantyn jeńip aldy. Bul qarajat mekteptiń ınfraqurylymyn jetildirýge jumsalyp, bilim ordasyn jańa bir belesterge jeteledi.
«Dırektor – pedagogıkalyq, ǵylymı-ádistemelik, uıymdastyrý basqarý mindetterin sheshýge qajetti jalpy teorııalyq pánder negizin tereń meńgergen bilikti maman bolýǵa tıis. О́z kásibinde jaýapkershilik, tabandylyq, qaıyrymdylyq negizderin basshylyqqa alady. Kez kelgen mektep dırektory bilikti basshy bolýǵa umtylýy zańdylyq. О́ıtkeni mektep jetistigi basshynyń iskerligine baılanysty. Dırektor bilikti uıymdastyrýshy ǵana emes, búgingi kún talaptaryna beıim kásip ıesi, menedjer údesinen shyǵýǵa tıis. Muǵalimniń mindeti oqýshyǵa sapaly bilim berý ǵana emes, onyń tulǵa bolyp qalyptasýyna yqpal etý. Osy oraıda árbir mekteptiń, bilikti ustaz, zamanaýı dırektorlardyń tájirıbesi jas mamandarǵa ónege, úlgi bolsa deımin. Osy ádistemelik quraldy jazýdaǵy maqsatym da jas dırektor áriptesterime qoldaý kórsetý edi», deıdi ol.
Bıylǵy oqý jylynda №90 mekteptiń basshylyǵyna taǵaıyndalǵan Bulbul Rasbekqyzy bilim sapasyn arttyrý baǵytynda básekelestik orta qalyptastyrýǵa basymdyq berip otyrǵanyn aıtady. Qazir atalǵan bilim oshaǵyn bilikti kadrlarmen qamtamasyz etip, qolaıly jaǵdaı jasaý basty nazarda tur. O.Jáýtikov atyndaǵy RMM, NZM mektepteriniń oqý baǵdaryn zerttep, ozyq tájirıbesine nazar aýdaryp otyrǵan mektepte muǵalimniń júktemesin azaıtý kózdelip otyr. Qazirgi tańda bala tárbıesine óte kóp kóńil bólý qajet bolyp otyrǵan jaǵdaıda «Adal azamat – birtutas tárbıe» baǵdarlamasy boıynsha mektepte kóptegen mazmundy is-shara iske asyp jatyr. Balaǵa sapaly bilim berýmen qatar, qaýipsizdigi basty nazarda tur. Osy oraıda tárbıe barysymen qatar pán muǵalimderine túsetin salmaqty azaıtý maqsatynda da tıimdi ádister qolǵa alyna bastady» dep atap ótti dırektor. Áńgime barysynda saladaǵy túıtkildi jaıttarmen bólisken Bulbul Rasbekqyzy tárbıe men bilim berýde ótken ǵasyrdyń 90-jyldary jibergen olqylyqtyń saldaryna qynjylysyn bildirdi. Kóptegen bilikti kadr jumystan ketip, salaǵa muǵalimdikke qatysy joq mamandar keldi. Keıingi jyldary osy olqylyqtardy joıý maqsatynda memleket tarapynan aýqymdy baǵdarlamalar iske asa bastady. «Pedagog mártebesi týraly» zań qabyldandy. Muǵalimderdiń aılyǵy kóterildi, qoǵamdyq jumystardan bosatyldy. Sonymen qatar pedagogıkalyq mamandyqtarǵa shekti ball kóterildi. Osyndaı ıgilikti ister barysyna toqtalyp ótken Bulbul Rasbekqyzy «Jaqsy oqyp, júrek qalaýymen muǵalimdikti tańdaǵan túlekterdiń mektepke kelýimen bilim sapasy artady. Qazirgi kezde mektebimizde ásirese, orys synyptarynda hımııa, bıologııa, orys tili, ınformatıkadan, bastaýysh synyp muǵalimderi jetispeıdi. Endigi kezekte mektepte qordalanǵan máseleler birte-birte sheshiletin bolady», deıdi B.Rasbekqyzy.
ALMATY