5 qazan. Ǵalym da, shahter de bas ıetin kásip ıeleriniń merekesi – bul. Naq osy kásiptiń kıesi de, qurmeti de sonda, el basqarǵan búgingi tulǵa da, kósh bastaǵan keshegi kósem de, san salanyń tasyn órge domalatqan saqa maman da – bári sol árip tanytyp, tálim-tárbıe bergen ustazdyń aldynan ótedi. Aqıqatynda «Alty alashtyń basy qosylsa, tór – muǵalimdiki».
Elimizde keıingi jyldary bilim berý salasynyń qyzmetkerlerine aıryqsha kóńil bóline bastady. Muny «Pedagog mártebesi týraly» zańynyń qabyldanýynan bastap, jalaqynyń júıeli jáne turaqty arttyrýynan, áleýmettik kómekterdi qarastyrý, pedagogıkalyq mamandyqtarynda oqıtyn stýdentterge ózgelerge qaraǵanda artyǵyraq stıpendııa tóleý, sanat boıynsha qosymsha ústemaqylardyń engizilýi, udaıy tegin oqytyp otyrý sekildi keshendi qoldaýdyń iske asyrylýynan kóre alamyz.
Bul mamandyqtyń mańyzy, salmaǵy onyń jaýapkershiliginde bolsa kerek. Sebebi ol – tulǵa qalyptastyrýshy, urpaq bolmysynyń baǵbany. Sondyqtan da qaı kezde bolsyn qoǵam muǵalimnen balaǵa beretin bilimmen qatar durys tárbıeleýdi kútedi. Sebebi urpaq tárbıesi ata-ana men pedagogtiń qolynda. Osy jaýapkershilik júgi Memleket basshysy ıdeıasymen qolǵa alynǵan «Adal azamat» birtutas tárbıe baǵdarlamasynda aıqyndalyp otyr. Basty mindet – jas urpaqtyń sanasyna ulttyq jáne jalpyadamzattyq qundylyqtardy sińirý, olardy otanshyl rýhta tárbıelep, jańashyldyq pen jasampazdyqqa baýlý.