Gımalaı taýlaryna jaýǵan nóser jańbyr ózenderdiń arnasynan tasýyna sebep bolǵan. Qutqarýshylarǵa shalǵaı aýyldarǵa jetý úshin jaıaý júrýge, sondaı-aq tikushaqtar men motorly qaıyqtardy paıdalanýǵa týra kelgen, dep habarlaıdy Egemen.kz DW-ge silteme jasap.
Nepal men Úndistanda bolǵan tabıǵı apattar 60-tan astam adamnyń ómirin qıǵan. Nepaldyń Tótenshe jaǵdaılarmen kúres ulttyq basqarmasynyń ókili Shantı Mahattyń aıtýynsha, 5 qazan kúnine qaraı elde keminde 43 adamnyń qazasy tirkelgen.
Shyǵystaǵy Ilam aýdanynda 37 adam qaza tapqan, taǵy beseýi iz-túzsiz joǵalǵan. Reuters deregine súıensek, Nepalda qurbandar sany keminde 47-ge jetken, kóshkinder birneshe aýyldy túgeldeı shaıyp ketken.
Úndistannyń Batys Bengalııa shtatyndaǵy Darjılıng aımaǵynda da nóser jaýynnan kóshkinder júrip, úıler men ınfraqurylym zaqymdanǵan. Bul jerde 20-dan astam adam qaza bolǵan.
Esterińizge sala keteıik, qatty jaýyn 3 qazanda bastalyp, eki kún ótken soń ǵana qutqarýshylar taý bókterindegi shalǵaı eldi mekenderge jete alǵan. Kóshkinder joldardy jaýyp, áýe qatynasynyń ýaqytsha toqtaýyna sebep boldy. Nepal astanasy Katmandýda da ózender arnasynan asyp, qalaǵa qaýip tóndirdi.