Qoja Ahmet Iаsaýı atyndaǵy Halyqaralyq qazaq-túrik ýnıversıtetiniń belgili professory, túrkologııa ǵylymynyń iri ókili Shákir Ibraev oqý ordasynyń kitaphanasyna 3000 kitaptan turatyn jeke qoryn syıǵa tartty, dep jazady Egemen.kz.
Fılologııa ǵylymdarynyń doktory, professor, «Parasat» ordeniniń ıegeri Shákir Ibraev — túrkologııa salasyna ólsheýsiz eńbek sińirgen, klassıkalyq akademııalyq mekteptiń kórnekti ókili. Bıyl ǵalymnyń 75 jyldyq mereıtoıyna oraı ýnıversıtet qabyrǵasynda «Túrkologııa jáne Shákir Ibraev zertteýleri» atty halyqaralyq ǵylymı-tájirıbelik konferensııa uıymdastyryldy. Is-shara HI Túrkologııa kongresi aıasynda ótti.
Professordyń aıtýynsha, kitaphanaǵa tartý etilgen bul qorda óz eńbekterinen bólek, ómir boıy jınaǵan sırek kezdesetin ádebıetter bar. Onyń ishinde qazaq, túrik, ázirbaıjan, ózbek, qyrǵyz, tatar, bashqurt, uıǵyr, arab, týva jáne basqa da tilderdegi ensıklopedııalar, sózdikter, fılosofııa, folklor, til men ádebıettanýǵa qatysty eńbekter men kórkem shyǵarmalar kezdesedi. Sondaı-aq 1937, 1938, 1940 jyldary jaryq kórgen «Qazaq sovet ádebıeti» men «Ádebıet hrestomatııasy» sekildi tarıhı basylymdar da bar.
Kitaphana qyzmetkerleri barlyq eńbekterdi salalary boıynsha suryptap, arnaıy bazaǵa engizdi. Búginde stýdentter men oqytýshylar bul qordy erkin paıdalana alady. Ǵalymnyń aıtýynsha, kitap tartý etýdegi basty maqsat – jyldar boıy jınaqtalǵan bilim kózin keler býynǵa amanattap, jas zertteýshilerdiń izdenisine jol ashý.