Mańǵystaýda Beket ata Myrzaǵululynyń 275 jyldyq mereıtoıy men onyń ustazy Shopan atanyń rýhyna arnalǵan aýqymdy sharalar ótti. Merekege 10 myńnan astam qonaq qatysty, dep habarlaıdy Egemen.kz oblys ákiminiń baspasóz qyzmetine silteme jasap.
Tobyqty jerinde ótken mereıtoıǵa Parlament depýtattary, zııaly qaýym, mádenıet jáne qoǵam qaıratkerleri, jastar jınaldy. Prezıdent Qasym-Jomart Toqaev quttyqtaý jedelhatyn joldap, onda Beket atanyń halqyna jasaǵan eńbegin, aǵartýshylyq jolyn jáne adamzatqa ortaq qundylyqtardy nasıhattaýdaǵy rólin erekshe atap ótti. Prezıdenttiń quttyqtaýyn aımaq basshysy Nurdáýlet Qılybaı oqyp berdi.
«Beket Myrzaǵululy – eline tutqa, jurtyna pana bolǵan tuǵyrly tulǵalarymyzdyń biri. Ol búkil ǵumyryn halqynyń dúnıetanymyn baıytýǵa arnap, aǵartýshylyqpen aınalysty. Sanaly urpaq tárbıeleýge aıryqsha mán berip, meıirimdilik, janashyrlyq, tatýlyq, birlik, ádildik sııaqty barsha adamzatqa ortaq qundylyqtardy dáriptedi. Beket ata kúlli qazaqqa jáne baýyrlas elderge ǵulama oıshyl, aty ańyzǵa aınalǵan áýlıe retinde tanyldy. Búginde Mańǵystaý óńirindegi jerasty meshitteri qulshylyq orny, bilim ordasy ári erekshe sáýlet óneriniń týyndysy retinde tanymal. Meniń tapsyrmammen, Oǵylandydaǵy jerasty meshitin jáne osy aımaqtaǵy basqa da tarıhı nysandardy IýNESKO-nyń Búkilálemdik muralar tizimine qosý úshin naqty jumys atqarylyp jatyr. Jurtyn izgilikke úndegen abyzdyń bolmysyn bıiktete túsetin mádenı-rýhanı qundylyqtar ultymyzdyń baǵa jetpes baılyǵy sanalady. Ony saqtap, urpaqqa mıras etý – paryz. Barshańyzǵa amandyq, baq-bereke tileımin», delingen jedelhatta.
Mereıtoı aıasynda Shopan ata men Beket ata meshitterine zııarat etilip, ulttyq sport saıystary, taı jarysy, alaman báıge, qazaq kúresi jáne basqa da jarystar uıymdastyryldy. Júzden astam kıiz úı tigilip, as berildi.
Sonymen birge «Oıtalqy» alańynda eldik pen birlikke qatysty pikirtalas ótkizilip, «Mańǵystaý mashaıyqtyń basqan jeri» atty konsert pen «Áýlıeler áýezi» óner keshi kórermenge usynyldy.
Aıta keteıik, barlyq sharalar demeýshilerdiń qarajaty esebinen ótti.