Ǵylym jáne joǵary bilim mınıstri Saıasat Nurbek Qazaq sport jáne týrızm akademııasynyń stýdenti Sherhan Qalmurzamen júzdesip, «Qaırat» fýtbol klýbynyń qaqpashysyna rektorlyq bilim berý grantyn tabystady, dep jazady Egemen.kz.
Sherhan Qalmurza buǵan deıin akademııada aqyly negizde bilim alyp júrgen. Saıasat Nurbek kezdesýde buqaralyq sportty damytýdyń mańyzdylyǵyna toqtalyp, sondaı-aq joǵary bilimniń bolashaq urpaqty qalyptastyrýda sheshýshi ról atqaratynyn atap ótti.
«Barlyq sportshy halyqaralyq standarttarǵa saı sapaly bilim alýy qajet ekenin atap ótkim keledi. Bul olarǵa sporttaǵy joǵary jetistikterge ǵana emes, sonymen qatar sporttyq mansabyn aıaqtaǵannan keıin de túrli salalarda qalyptasýǵa múmkindik beredi. Jas qaqpashynyń kórsetken tarıhı nátıjesi – búkil qazaqstandyq jastar úshin jarqyn úlgi. Ony osy jetistigimen quttyqtaımyn jáne aldaǵy oıyndarda sáttilik tileımin!», dedi Ǵylym jáne joǵary bilim mınıstri.
Sherhan Qalmurza kórsetilgen iltıpatqa rızashylyǵyn bildirip, Qazaqstandaǵy fýtboldyń damýyna úles qosýǵa nıetti ekenin jetkizdi.