Almaty qalasynyń Ekologııa jáne qorshaǵan orta basqarmasyna qarasty «Medeý» memlekettik óńirlik tabıǵı saıabaǵynyń málimetinshe, memlekettik orman qory sanatyna jatady jáne erekshe qorǵalatyn tabıǵı aýmaqtyń bir bóligi sanalatyn Baým toǵaıynda 104 429 aǵash jáne 5081 buta bar, dep jazady Egemen.kz.
AShM Orman sharýashylyǵy ǵylymı-ınnovasııalyq ınstıtýty deregi boıynsha apatty jaǵdaıda turǵan aǵashtardyń úlesi jalpy kórsetkishtiń 9 paıyzynan sál ǵana asady. Keler jyly aýmaqty abattandyrý aıasynda toǵaıdyń jasyl qoryn tolyqtyrý jáne tabıǵı shyǵyndy óteý maqsatynda myńnan astam jańa aǵash egý baǵdarlamasy júzege asady.
Aǵashtardy sanıtarlyq saýyqtyrý barysynda qýrap qalǵan jáne zaqymdanǵan butaqtardy kesý, zııankester men aýrýlarǵa qarsy kúres júrgize otyryp, sanıtarlyq maqsatta kesý, ekpelerdi óńdeý jáne aǵash dińiniń aınalasyn aldyn alý tazalaý jumystary júrgiziledi. Bul sharalar aǵashtardyń saýlyǵyn, pishinin jáne uzaq tirshilik etýdi saqtaýǵa baǵyttalǵan. Toǵaıdaǵy jumystar tabıǵı ortaǵa meılinshe zııan tıgizbeýge baǵyttalyp otyr.
Abattandyrý jumystarynda sement-beton buıymdaryn qoldanbaı, ekologııalyq materıaldar paıdalanylady. Ekologııalyq júrginshi jolaqtary men energoúnemdegish jaryqtandyrý ornatylyp, kelýshilerdiń qaýipsizdigin qamtamasyz etý úshin polısııa beketteri men beınebaqylaý júıeleri qarastyrylady. Toǵaıdy qalpyna keltirý jumystary qatar júrp jatyr. 2023 jyly eriktiler Sıvers almasy men japyraqty tuqymdardyń 1430 kóshetin, byltyr emen, shyrsha jáne órik aǵashtarynyń 720 kóshetin otyrǵyzdy. Jumys eriktiler men demeýshiler esebinen júzege asyp jatyr. Osylaısha, Baým toǵaıyndaǵy barlyq is-shara tek biregeı tabıǵı aýmaqty saqtaý, saýyqtyrý jáne qalpyna keltirýge baǵyttalyp, turǵyndardyń demalys ornyn qalanyń jasyl nyshany retindegi rólin arttyrý jumystary jalǵasyn taba beredi.
ALMATY