Almatyda shahmattan jasóspirimder (U-8, U-12) arasynda ótken álem birinshiliginde elimizdiń quramasy tolaǵaı tabysqa qol jetkizip, jalpykomandalyq esepte birinshi oryndy ıelendi.
Alataý baýraıynda 88 memleketten kelgen 842 qatysýshy baq synady. 11 týrdan turǵan jarys shveısarııalyq júıemen ótti. Jer-jahannyń asa daryndy jas órenderi bas qosqan baıraqty básekede aldymen Alısha Bısalıevanyń (G8) baǵy jandy. Sheshýshi tusta Chjý Szıahe (Qytaı) men Bold-Erdene Selmegti (Mońǵolııa) basyp ozǵan ol bas júldeni oljalady.
О́z qatarlastarynyń barlyǵyn qapy qaldyrǵan Ádınur Ádilbek (O8) te altynnan alqa taqty. Kúmis pen qola medaldy Fıodor Sıdelnıkov (Reseı, FIDE) pen Van Iýısıýan (Qytaı) enshiledi. 12 jasqa deıingi oıynshylar saıysynda Danıs Qýandyquly (O12) men Álı Poıraz О́zdemır (2196, Túrkııa) birdeı upaı jınaǵanymen, qosymsha kórsetkishter jóninen qandasymyz qarsylasynyń aldyn orady.
Sóıtip, úsh altyn ıelengen elimiz shahmatshylary jarys kestesinde jeke-dara kósh bastady. Ekinshi, úshinshi oryndarǵa Qytaı, AQSh quramalary ıe boldy. Byltyr da jerlesterimiz qos altyn oljalap, jalpy esepte aldaryna jan salmaǵan edi. Bıyl sol nátıjeni qaıtalady.