Úrjar aýdanynyń Besterek aýylynda 19 tamyzda bolǵan qaıǵyly jol apatynan keıin bir aıdan astam ýaqyt komada jatqan qyz bala kóz jumdy, dep habarlaıdy Egemen.kz.
Esterińizge sala keteıik, Besterek aýylynda Toyota markaly kólik júrgizýshisi úıdiń qaqpasy aldynda oınap júrgen balalardy qaǵyp ketken. Oqıǵa ornynda eki bala qaza taýyp, taǵy bireýi aýrýhanaǵa barar jolda kóz jumdy. Taǵy úsh bala túrli jaraqatpen aýrýhanaǵa jetkizilgen edi.
Zardap shekkenderdiń ekeýi sanıtarlyq avıasııamen Astanaǵa jetkizilip, em alyp, qazir ońaltý kýrsynan ótip jatyr. Al Besterekte emdelgen qyz bala esin jımastan kóz jumdy.
«Zardap shekken kishkentaı qyzdyń jaǵdaıy aýyr edi. Dárigerler qoldan kelgenniń bárin jasady. Alaıda onyń jaraqaty tym aýyr boldy. Ol esine kelmesten kóz jumdy», dedi óńirdiń densaýlyq saqtaý basqarmasynyń ókilderi.
Qazir bul derek boıynsha qylmystyq is qozǵalǵan.