«Qaırat» fýtbol klýbynyń shabýylshysy Dastan Sátpaev Qazaqstan quramasynyń aldaǵy oıyndaryna ne sebepti qatyspaıtyny belgili boldy, dep habarlaıdy Egemen.kz.
Almatylyq «Qaırat» komandasynyń shabýylshysy Dastan Sátpaev 2026 jylǵy álem chempıonatynyń irikteý kezeńindegi qazan aıyndaǵy matchtarda Qazaqstan quramasyna qómektese almaıdy. Resmı málimet boıynsha, fýtbolshy jaraqat alǵan.
Jeksenbi kúni Sátpaev «Jetisýǵa» qarsy ótken kezdesýde tolyq 90 mınýt alańda bolyp, tipti gol da soqqan edi.
Klýbtyń ardageri Quralbek Ordabaev bul jaǵdaıǵa qatysty pikir bildirdi:
«Sońǵy match aldynda Dastan ózin jaısyz sezingen, biraq komandaǵa kómekteskisi kelip, eshkimge tis jarmaǵan. Soǵan qaramastan, ol tolyq oıyn ótkizip, gol soqty. Biraq matchtan keıin aýyrsyný kúsheıip, medısınalyq shtabqa júginýge májbúr boldy. Tekserý kezinde sol jaq jambas bulshyqetinde shamamen tórt santımetrge jýyq isiný, sińirdiń sozylýy jáne mıkrojaryqtar anyqtaldy. Bul jas aǵza úshin úlken júkteme, sondyqtan dárigerler oǵan klýb bazasynda qalyp, qalpyna kelý kýrsynan ótýdi usyndy», deıdi ol.
Qurama sapyna chempıondar qatarynan tek Damır Kasabýlat qana qosyldy.
Aıta keteıik, álem chempıonatyna irikteý kezeńinde J tobynyń týrnırlik kestesinde tartys qyza tústi. Qazir kósh basynda 5 matchtan keıin 11 upaı jınaǵan Soltústik Makedonııa, ekinshi orynda — 4 oıynnan 10 upaı jınaǵan Belgııa, al dál sondaı upaımen 5 match ótkizgen Ýels úshinshi orynda.
Qazaqstan quramasy 5 oıynda 3 upaı jınap, tórtinshi satyda tur. Al barlyq bes matchta jeńilgen Lıhtenshteın týrnır kestesin túıindep tur.